KHAWTHLIR

Thisen pe
Adventist Youth Federation, Lunglei North chuan July 24, Inrinni khan Civil Hospital, Lunglei Blood Bank-ah thisen unit 16 an pe a, petute mipa 12 leh hmeichhia pali an ni.

Tanpuina hlan
Aizawl South-I bialtu MLA C Lalsawivunga chuan July 23, 2021 khan a bial chhung veng hrang hranga community covid care centre-ah ei leh in tur leh hripui dona hmanraw chi hrang hrang a hlân. C Lalsawivunga chuan, tun dinhmunah chuan thuawih taka dan zawm chu thupui bera neih a ngai tih hre turin a bial mipui a chah a ni.

Ruang chhar
Nimin chawhnu dar 2 khan Serchhip bula Mat lui Châwmkaiah ruang chhar a ni a, Myanmar lam mi Khama (kum 60 vel) a ni tih finfiah a ni. Thu dawn danin, Khama hi mahnia khawsaa mi ina awm kual ṭhin a ni a, Lalduhawma, Serchhip Darnam Veng fu huan thláma khawsa mek a ni.

Officer-te'n tanpui
Hnahthial Officers’ Club (HOC) chuan sum an thawh khawm Rs. 1,50,500 aṭangin nimin khan Hnahthiala YMA branch pariat leh Hnahthial damdawi-in hnenah ṭanpuina an hlan. HOC hian chhungkaw khawsak harsa 47 thlengin, chung mite hnenah chuan YMA kaltlangin Rs. 2,000 ṭheuh an pe a; Hnahthial damdawi-ina damlo ṭanpui ngaite tan Rs. 20,000 an pe bawk.

MNF sorkar puh
ZPM Ṭhalai chuan thuchhuah siamin, Kolasib District Hospital-a thawk tur mi 14 lakna tur advertisement Kolasib Block MNF Secretary-in a chhuah chuan Mizoram mipui a barakhaih tih an tarlang a, "An mite duhsakna kawngah MNF sorkar hian khua a hmu lo," an ti.

BJP-in MLA dem
BJP, Mizoram Pradesh chuan thuchhuah siamin, Govt deputy chief whip Lalrintluanga Sailo, MLA-in total lockdown laia party programme a siam chu an dem thu an tarlang a, "Amah zuitu ngei mai Covid-19 positive tih hmuh chhuah a nih avangin a tlawh khuate tan lungngaihna thlentu mai ni-ah kan ngai," an ti.