Hripui vangin mi 3 thih belh

July 23, Zirtawpni zan aṭanga nimin tlai dar 6 thleng khan Mizoramah Covid-19 vei thi pathum an awm belh a; sorkar chhinchhiah angin, hripui vangin Mizoramah mi 136 an thi tawh.

Lalruatfeli (14) d/o Vanlal­mawia, Bungkawn Vengthar chu July 23 zan dar 9:40 khan Covid-19 vangin an chenna inah a thi a, Inrinni khan a pi leh pute khua Vaphaiah vui a ni. Thu dawn danin, Lalruatfeli hi Covid-19 positive a ni tih July 21, 2021-ah hmuh chhuah niin, inah an inenkawl a, a nat zual avangin SRH-ZMC pan an tum laiin a thi. An chhungkuain Covid-19 an vei vek a, a unaute CCC-ah awmin, a nu leh pa nen inah an inenkawl a, SRH-ah a pi enkawl mek a ni bawk.

July 24, Inrinni zing dar 7 khan Abdul Mateen (61), karimganj, Assam, Kolasib Venglaia khawsa mek chu hripui vangin Jordan centre CCC, Seṭhawnah a thi. Amah hi Covid-19 positive a ni tih July 23, 2021-ah hmuh chhuah a ni a, a tuk July 24-ah a thi nghal a ni. A ruang hi an khua, Karimganj lamah lak a ni tih sorkar tihchhuahin a tarlang.

Nimin chawhma dar 11 khan Parneihkhara (85) f/o Sangzawna, Bawngkawn pawh hripui vangin State Referral Hospital-ah a thi a, Covid-19 vanga thi 136-na a ni. Amah hi stroke nei, hun rei tak bawksawp tawh a ni a, Covid-19 positive a ni tih July 22, 2021 khan an venga sample endik rûnpuiah hmuh chhuah a ni a, July 23-ah SRH-ah dah luh a ni.