Politics-a hlâwkpui tuma Covid-19 doah ZPM-in sorkar an puh

ZPM party chuan thuchhuah siamin, Mizoram sorkar chu politics-a hlâwkpui tuma Covid-19 hripui doah an puh a; tun thlenga inkhàrkhip a ngaih chhan chu hripui do dan a dik loh vang leh mipuiin an retheihpui rei tawhzia haider tawh lo turin sorkar an ngen.

ZPM thuchhuah chuan, Covid-19 hripuiin kum khat leh a chanve Mizoram a luhchilh tawh chungin tun thlengin khawpui leh thingtlangah hripui a darh zual zel tih a tarlang a, "Kai tam ber ní kan la thleng indawt reng mai hi politics-a hlâwk tum ràn chunga sorkarin hri min dopui vangah kan ngai," a ti.

Tun thlenga khauh taka inkhàrkhip a la ngaih chhan chu hripui do dan dik tâwk loh vang a ni tih pawm ngam turin ZPM chuan sorkar an phût a, "Hripui do nan mimal leh pawl tlawmngaite'n mahni veng/khuaah thilpek ṭhahnem tak an pe a, CM Relief Fund-ah ṭhahnem tak an thawh hi a lawmawm. Sorkar pawhin budget session-a sum hman dan a ruahman zawm hlei thei loin a rem rem a pawt a ni," an ti a; chuvang chuan, budget ennawn a nih theih nan special assembly session koh a ṭul takzet thu an sawi.

ZPM chuan, tun dinhmun a thlen loh nan an party-in sorkarah vawi duailo rawtna an lo thlen tawh tih an sawi a; ZMC tilian tur leh a dang siam belh tur te, ICU leh laboratory siam belh a, bungraw mamawhte ngaihtuah belh tur te, thawktu indaih lohna phuhru tura thawktu lak belh thuai turtein sorkar an lo ngen tawh tih an tarlang.

ZPM party chuan, tun thlenga RT-PCR laboratory pakhat chiah a la awm te, hripui vei damlo enkawl ngai zual, hmun hlá aṭanga SRH-ZMC pan zel a ngai leh thleng zo loa kawng laka thi an awm hial tawh hnu pawha sorkarin siam belh a tum lo chu àwm lo an tih thu an sawi a, "Sorkar hian mipui dinhmun ngaihtuah nawn leh a, hripui leng thawh thumna thlen hma ngeia mamawhte tipuitling turin kan ngen nawn a ni," an ti.

ZPM chuan, Kolasib Hospital-a SEDP suma voluntary worker lak tumna awm chu lawmawm an tih thu an sawi rualin, ruling party MNF Block Secretary-in advertisement a chhuah leh party mi chauh lak tumna ang chi chu sût turin sorkar an ngen a; ruling mi ni lote thilpek leh rawtna thlente chu ngai pawimawh tawh turin sorkar an chah bawk.