COVID-19: Mizoram dinhmun : Ni 2 chhungin hripui vei 1,591 hmu

July 23-24, 2021 chhung khan Mizoramah Covid-19 vei mi 1,591 hmuh chhuah a ni a, July thla chhungin mi 11,591 hmuh a ni tawh. Inrinni leh nimin khan hripui laka fihlim tawh mi 133 chhuahtir an ni a, mi pathum an thi.

July thlaah ni 24 chhungin Covid-19 vei mi 11,591 hmuh a ni tawh a, chawhrualin ni tin mi 482 chuang hret (482.96) hmuh chhuah an awm ang a ni a, sample endik rûnpuia hmuh chhuah zinga a tam zawk an la tel lo. Nimin zinga positive result tihchhuah hnuah enkawl mek mi 8,710 an awm a, active case a tam lai ber a ni.

IDSP record angin, Mizoramah Covid-19 vei mi 32,083 hmuh chhuah a ni tawh a, mipa 17,356 leh hmeichhia 14,727 an ni. Nimin tlai dar 5 thleng khan mi 23,371 (72.85%) chhuahtir an ni tawh a, mi 136 (0.42%) thi tawhin, enkawl mek mi 8,576 (26.73%) an awm.

Covid-19 vei July 23-a hmuh chhuah mi 653-te chu mipa 307 leh hmeichhia 346 an ni a; ZMC laboratory-a hmuh chhuah 147, TrueNAT hmanga hmuh 43 leh RAT hmanga hmuh 463 an ni. July 24, Inrinniah mi 938 hmuh chhuah niin, hmuh chhuah tam ber ní a ni a; ZMC-a hmuh 364, TrueNAT hmanga hmuh 40 leh RAT hmanga hmuh 534 niin, mipa 458 leh hmeichhia 480 an ni.

July 23, Zirtawpnia swab sample endik dan chu - ZMC-ah Aizawl district-ah mi 1,781, TrueNAT hmangin district 11-ah 445 leh RAT hmangin district 11-ah 3,317 a ni a, a vaiin sample 5,543 (mipa 2,922, hmeichhia 2,621) niin, chu'ng aṭanga hripui vei hmuh chhuah 653 chu 11.78% a tling. Positive percentage hi ZMC-ah 8.25%, TrueNAT-ah 9.66% leh RAT-ah 13.95% a ni.

Zirtawpnia district-a Covid-19 positive hmuh dan chu - Aizawl district-ah mi 481, Lungleiah 81, Kolasib-ah 38, Mamitah 25, Siahaah pakua, Champhai leh Serchhipah pariat ve ve leh, Saitualah pathum a ni. Mi 653-te chu natna lang chhuak 317 leh lang lo 337 an ni a; tualchhunga kái mi 649 leh state pawn aṭanga tun hnaia rawn lut mi pali niin, tualchhunga kai zingah kàina chin hriat loh mi 228 an awm.

Kum 60 chung lam mi 50 vel awmin, a zatve aia tamin symptom an nei a, a upa ber chu kum 91 mi a ni. Nausén kum khat tling lo 12 an awm bawk. July 24, Inrinnia swab sample endik dan chu - ZMC-ah Aizawl district-ah mi 1,719, TrueNAT hmangin district pariatah 473 leh RAT hmangin district 11-ah 2,427 a ni a, a vaiin sample 4,619 (mipa 2,471 leh hmeichhia 2,148 niin, chu'ng aṭanga hripui vei hmuh chhuah 938 chu 20.30% a tling.

Positive percentage hi ZMC laboratory-ah 21.17% niin, ZMC-a hripui vei hmuh tam ber ni a ni a; TrueNAT-ah 8.45% leh RAT-ah 22% a ni. Inrinnia district-a Covid-19 positive hmuh dan chu - Aizawl district-ah mi 643, Kolasib-ah 103, Mamitah 54, Lungleiah 52, Champhaiah 32, Lawngtlaiah 27, Serchhipah 16, Siahaah 10 leh Saitualah mi pakhat a ni. Natna lang chhuak 384 leh lang lo 554 an ni a; tualchhunga kái mi 928 leh state pawn aṭanga rawn lut mi 10 niin, tualchhunga kai zingah kàina chin hriat loh mi 303 an awm.

Mi 938 zingah kum 60 chung lam mi 60 chuang awmin, an zinga mi 20 chuangin symptom an nei a, a upa ber chu kum 90 mi a ni. Nausén kum khat tling lo 11 an awm a, an zinga pathum chu ni 5-a upa an ni. Nimin khan tlai dar 5 thlengin hripui laka fihlim tawh mi 133 chhuahtir an ni a; Inrinni khan mi 334 chhuahtir an ni bawk.