MNYF-in H/S zirtirtu lak an sawifiah

MNF party ṭhalaite chuan thuchhuah siamin, high school hrang hranga advertisement chhuah loa zirtirtu 150 chuang lak chu sorkar remtihna leh thutlukna anga lak a nih thu an tarlang a; zirna hmasawnna tura sorkar hmalakna chu chhuanawm an tih thu an sawi.

MNYF chuan, high school-ah zirtirtu indaih lohna a nasa tih sawiin, "Sorkar chuan hriain H/S zirtirtu 157 lak phalna kum 2020 tir khan a pe a, MPSC lak tur a ni a, Covid-19 a lên avangin lâk theih a ni ta lo. MPSC kaltlanga lak theih a nih hmaa indaih lo zual phuhrûkna tur Education Minister-in SEDP aṭanga kawng zawngin CM hnenah a thlen a, CM hian hripui léng vanga sum harsat em em laiin rem a lo ruatpui ta a ni," an ti.

Sorkarin H/S zirtirtu lak a phal chungchang chu Education Minister-in a lo sawi tawh a, January 21, 2021-a sorkar thuchhuahah tarlan a ni tih sawiin MNYF chuan, "Sorkarin ruahmanna a siam angin sikul lamah Grant-in-Aid pein Managing Committee-te mawhphurhnain khawtual mite'n lawmman tlemtê dawngin khawtlang tana an thawk hi lawmawm kan ti a, hun harsa kara zirna ngai pawimawha remhre taka ruahmanna siam a ni hi lawmawm kan ti tak zet," an ti a; sorkar ruahmanna chu H/S tam takin a zar an zo niin an sawi.

Sorkarin uluk taka zirlaite hmakhua thlira a theih ang anga hma a lak laia NSUI (Mizoram)-in H/S zirtirtu 150 chuang lâkte bàn an phût chu pawi an ti tak zet thu MNYF chuan an tarlang bawk.