Covid hospital din belh turin sorkar phût

Congress party ṭhalaite chuan thuchhuah siamin, Mizoram sorkar chu district tinah leh Aizawlah dedicated covid hospital (DCH) a rang lama din belh turin an phût.

MPYCC chuan, tun dinhmunah SRH-ZMC chiah Mizoram pum tan Covid-19 vei damlo enkawlna atan liau liaua damdawi-in dedicated/designated Covid-19 hospital a awm tih tarlangin, "Covid-19 vei damdawi-ina enkawl ngai a ni têlin an pun zel avangin Covid-19 vei bik chauh enkawlna damdawi-in hi a rang lama neih belh a ngai a, hei aia ngaih pawimawh hmasak tur a awm lo," an ti a; SRH-ZMC-ah khum leh ICU indaih lohna avang leh DCH pakhat chauh a awm avangin hripui veite tan a thlamuanthlak loh hle tih an sawi.

Covid-19 damlo enkawlna SRH-ZMC-ah khum an indaih lohna nasatzia a chiang tih sawiin MPYCC chuan, "ICU leh khum indaih lohna a nasa a, CCC leh CCCC aṭanga damlo enkawl ngai zual ZMC-a thawn phei zung zung turah harsatna nasa tak awmin, a huna thawn phei hman loh an tam tih a hriat a ni," an ti a; R Dengṭhuama Hall leh hall dangte chu field hospital anga ruahman a, DCH atana hman theiha an ngaih thu an tarlang.

Congress ṭhalaite chuan, Delhi sorkarin May 3, 2021 khan sorkar doctor-te indaih lohna avangin a ṭul angin specialist doctor-te ni khatah Rs. 8,000 per shift (darkar 8 riat thawkin) hlawhin an rawih belh tih an sawi a, "Mizoramah pawh sorkara lut lo doctor, nurse, etc. hman ṭangkai theih nan, volunteer-a innghat ringawt loin, kut hah man siamsakin hripui donaah hian tun aia nasain sorkarin hma a la thei a, hmalak tum rawh se," an ti.