Endik rûnpui neih zel dan tur sawiho

Health minister Dr R Lalthangliana hoin nimin khan Secretariat Conference Hall-ah Aizawl khawpuia swab sample endik rûnpui (mass testing) neih mek chak zawka kalpui dan tur sawiho a ni.

Health Minister chuan, kar kal ta chhunga mass testing tluang taka kalpui a ni chu lawmawm a tih thu sawiin, "Lockdown chhunga chak taka ruahman anga hmalak a ni hi thawktute inpekna leh LTF, YMA leh kohhran hruaitute bakah, mipui thlàwpna vanga hlawhtling thei a ni," a ti.

Sample endik a tam avangin hripui vei hmuh chhuah a tam lo thei lo tih sawiin R Lalthangliana chuan, "Positivity rate pawh a sang ngei tur a ni. Hemi avang hian thlaphàn leh chiai tur a ni lo a, kan duh dan leh beisei ang tak a ni a, hri kaite kan hmuh chhuah zung zung hi kan tan a ṭha zawk a ni," a ti.

Ṭhutkhawmah hian, hripui vei punna veng a awm belh zel avanga thawktu indaih lohna phuhru turin volunteer lak belh dan tur sawiho a ni a; lockdown zawh hnuah pawh ruahmanna felfai tak nen endik rûnpui kalpui zel a ṭul dawn thu sawi a ni bawk.

Tun dinhmunah IDSP-in sample collecting/testing team panga an nei a, team pakhatah sample latu (laboratory technician) pali leh data entry operator paruk zel an awm.

Ṭhutkhawmah hian Health secretary R Lalramnghaka, Health department hotu te, Indian Medical Association, Non-Government Hospital Association of Mizoram leh Medical Operational Team on COVID-19 aiawhte an tel a ni.