Damdawi-in tihchangtlunna atan NEDP sum vbc. 72 hman a ni tawh

Mizoram sorkar chuan State Referral Hospital leh district hrang hranga damdawi-in thuam ṭhat nan, New Economic Development Programme (NEDP) aṭangin cheng vbc. 72 man hmanraw chi hrang hrang ṭha a lei tawh. Sorkar kum tharah pawh State Referral Hospital-a medical college dinna tura thuam nan cheng vbc. 20 dah leh tum a ni.

Hospital & Medical Education (HME) department hotute sawi danin, State Referal Hospital-a 'Mizoram Institute of Medical Education and Research (MIMER) din tura sorkarin hma a laknaah, NEDP aṭangin kum 2016-17 chhungin cheng vbc. 28 hman a ni a, kum 2017-18 chhungin vbc. 15 hman leh niin, sorkar kum thar 2018-19 chhungin vbc. 20 dah leh tum a ni.

NEDP sum hmangin Mizorama damdawi-in ṭhenkhata hman tur hmanruate pawh lei a ni a, tunah hian ram dang aṭanga hmanraw ṭha tak tak - Rs. 11,58,975 man incenerator, Rs. 15,43,596 man oxygen plant, Rs. 33,60,000 man dialysis machine leh IOKVA UPS Rs. 5,23,000 mante chu lo thleng mai tura ngaih a ni.

Vanglaini palaiin State Referal Hospital a tlawhnaah, Mizoram sorkarin NEDP aṭanga a lei leh MRU project aṭanga an dawn khawl thar hmuh tur a tam tawh hle. Khawlte hi May 2017 vel aṭangin an dawng ṭan a, kumin February thla kal lai thlengin dah thar zel a nih thu an sawi.

Radiology department-ah CT Scan leh MRI tihna tur siam mek a ni. Doctor-te chuan MRI chu Mizoram sorkar damdawi-ina a hmasa ber tur a nih thu sawiin, "CT Scan pawh a lei tur tihfel a ni tawh," an ti.

Tun hnaiah x-ray khawl, computerised machine thar, ultrasound khawl thar ṭha tak an nei a; laboratory room-ah khawl dah thar a awm nual. A langsar zual zingah biopsy lâkna (tissue processor) khawl thar MRU project hnuaia an dawn te, rannung seh endikna khawl thar te, thisen endikna khawl tharte an nei a ni.

Mit doctor-te chuan, an hmanraw neih tharte chu tunlaiah chuan a aia ṭha a awm chuang lo nia sawiin, "Hmanraw hrang hrangte hi a vaiin cheng nuai 100 chuang man a ni a, mit chhung enna leh mit chhunga thi pût leh cancer pawh awm se hriat chhuah theihna a ni. A nih tur ang a kim hunah chuan phai pan ngai loin kan khawih thei ang," an ti.

Ha lam enkawlna leh inzaina pindante pawh khawl ṭha ber ber hmanga thuam a ni a, doctor-te chuan, "World class tak tak a tling," an ti. Medical college ni turin library ṭha tak neih a ngai a, a tlem berah lehkhabu 1,500 tal dah tura tih niin, lehkhabute pawh lei fel thawkhat a ni tawh.

State Referral Hospital-ah hian doctor dah belh zel a ni a, tun dinhmunah doctor 47 an awm mek. Thawktute awmna tur quarters mi/chhungkua 224 awm theihna a awm a; Aizawl aṭanga Falkawn damdawi-ina kal bus chuan man pawh Rs. 30 aṭangin Rs. 10-ah tihhniam tum a ni bawk.

HME department hotute sawi danin, NEDP sum hmangin district hospital-te pawh thuam chak mek a ni a, district hospital thuam ṭhat nan hian kum 2016-17 khan cheng nuai 900 leh 2017-18 chhungin nuai 2000 pek a ni; kum 2018-19 chhunga pek zat tur erawh hriat a la ni lo.

NEDP sum hmangin district hospital tan ultrasound, endoscopy, digital x-ray leh colposcope khawl tharte lei a ni. Chief Minister-in district hospital zawng zawngah CT Scan dah vek a duh thu a sawi tawh a; CT Scan khawl pakhat chu cheng nuai 280 man a ni a, Mizoram STate Cancer Institute, State Referral Hospital, Aizawl Civil Hospital leh Lunglei Civil Hospital-ahte awm tawh mah se, radiologist an indaih loh avangin district hospital dangah an la dah thei lo niin an sawi.