Chemo-Treatment Room hawng

UDPA minister Zodin­tluanga chuan, UDPA department hnuaia New Economic Development Policy (NEDP) kaltlanga Christian Hospital, Serkawna Chemo-Treat­ment Room siam thar chu February 10, Inrinni khan a hawng.

Zodintluanga chuan, Christian Hospital doctor leh nurse-te thawhrimna leh inpekna fakawm a tih thu sawiin, mi harsa leh natna khirh tak tak veite ṭhahnemngai leh hmangaih taka an lo enkawl ṭhin avangin an chungah lawmthu a sawi a; "In hnathawh ropui tak avangin mi tam takin damna an chang ṭhin, in hahna leh inpekna hi a thlawn lo a ni," a ti. Chemo-Treatment Room chu Mizoram chhim lam mipui, thingtlang kilkhawr tak taka chengte tan malsawmna leh damna thlentu a nih ngei a beisei thu a sawi bawk.

Christian Hospital medical superintendent Dr B Laldinliana sawi danin, Chemo-Treatment Room-ah hian khum pathum dah a ni a, air conditioner, TV, geyser, bathroom, nursing station leh damlo awmpuitute chawlh hahdamna tur te, cardiac monitor pathum leh syringe pump pathum dah a ni.

Chemo-Treatment Room sakna atan hian UDPA department chuan NEDP kaltlangin Rs. 12,30,000 an pe a ni.