KHAWTHLIR

Tipper-in chíl hlum
February 10, Inrinni zan dar 11 vel khan Sangau, Lawngtlai district-ah 407 tipper-in Abraham Lalrinngheta (15), s/o TC Vanthanga, Sangau-IV a chíl a, Abraham Lalrinngheta hi ká chhawn lohin a thi. Sangau aṭanga thu dawn danin, Abraham Lalrinngheta chiltu tipper hi MZ-07 2485 a ni a, J Hrangnawla, Sangau-I ta niin, a khalhtu chu Zorama a ni.

Thisen pe
Khatla South Branch KṬP chuan, KTP Day lo thleng tur pualin February 10, Inrinni khan Synod Hospital tan thisen unit 33 an pe a, a petute mipa 31 leh hmeichhia pahnih an ni.

Jubilee lawm
UPC (Mizoram) Headquarters Bial PYD chuan February 9, Zirtawpni aṭang khan an headquarters kohhranah golden jubilee an lawm a, nizan thleng khan an lawm. PYD (Mizoram) headquarters bial hi kum 1968-ah din a ni a; tun ṭuma golden jubilee an lawm rual hian bial conference vawi 51-na an hmang nghal a ni.

Hmeichhe khawmpui
Mizoram Presbyterian Kohhran Hmeichhiate chuan February 9, Zirtawpni zan aṭang khan pastor bial tinah inkhawmpui an hmang a, nizan khan a ṭiak. Hmeichhe inkhawmpuiah hian Inrinni khan rorel inkhawm neih a ni.

MUP in hawng
Mizo Upa Pawl (MUP) in, Lunglei Zotlanga mi chu Inrinni khan Social Welfare minister PC Lalthanliana'n a hawng. MUP in sakna atan hian minister PC Lalthanliana'n a MLA fund aṭangin Rs. 6,00,000 a pe a, a dung ft. 34 leh a vâng ft. 14-a sak a ni.

Faina kawngzawh
Siaha District Joint V/C chuan Inrinni khan Swachh Survekshan, 2018 beihpui thlak kal mekah faina kawngzawh an huaihawt a; kharna inkhawm hi MLA Dr K Beichhua-in a hmanpui. Kawngzawhah hian Don Bosco School, Foxall Higher Secondary School leh Children Training School zirlaite an tel a, New Colony aṭanga New Siaha-a Vety Kâwn thleng an kal.