Lunglei MJA-in inkhawmpui hmang

Mizoram Journalists Association (MJA), Lunglei district chuan February 10, Inrinni khan Lunglei Press Club-ah Annual Conference an hmang a, IPR director David L Thangliana'n a hmanpui.

Inkhawm hi Lunglei MJA vice president Lal­tlan­thanga'n a kaihruai a; David L Thangliana chuan, Mizoram mai ni lo, khawvelin journalist-te a ngai pawimawhin a ngaihlu em em tih sawiin, "Journalist chuan thu dik a ṭan tlat tur a ni a, a thuchhuah tur chu thu dik a ni em tih finfiah hmasa loa social media vela thil post chhuah nghal ngawt zel hi a him lo. Kan thuchhuah reng reng belhchian a dâwl tur a ni a, a rintlak tur a ni," a ti.

Khualzahawm, MJA general headquarters vice pre­sident Zonunsanga Khiangte pawhin thu sawiin, hna thawhna kawngah rinawm leh dik, taima taka thawh zel a pawimawh thu a sawi.

Lunglei MJA-te hian chawhnu lamah hruaitu thar an thlang a; president atan H Lalthansanga (Lunglei Times), vice president atan Lalrintluanga Khiangte (Daifim) leh treasurer atan F Lalngaihzuala (JB Cable)-te an thlang a ni.

Lunglei MJA Conference Resolution
1. Lunglei leh Aizawl inkar World Bank road, Pûkpui leh Tlawng inkar siam mék chu, tun dinhmuna an hnathawh dan leh an hnathawh chin enin hmabak a la tam hle a. He kawngpui hi Mizoram chhim lam district-te tan, ni tin mamawh ei leh bâr engkim châwk luhna kawngpui ber a nih avangin, ṭhál chhung ngeia siam zo hman turin sorkar leh a mawhphurtu te, MJA Lunglei district chuan kan phût tlat a ni.
2. Mizoram chhim lam power supply pekna tur line thar 132 KV Melriat to Khawiva via Buarpui (alternative line) siam mêk hnathawh zawh hun tiam a pelh hnu pawha siam zawh a la ni lo fo hi a rang thei ang bera siam zawh a nih a, hman a nih thuai theih nan theihtawp chhuah a, chak lehzuala thawk turin a mawhphurtute kan phut tlat a ni.