Vety Minister-in MULCO hmun a tlawh

AH&Vety minister C Ngunlian­chunga chuan, February 9, Zirtawpni khan MULCO Complex, Ṭhuampui a tlawh a, MULCO Board of Directors leh Ṭhuampui Local Council member-te nen an inkâwm.

C Ngunlianchunga chuan, Gujarat-a Milk Cooperative Society, AMUL angin MULCO pawhin Mizoramah bawng vulhtute chak zawk a phuar khawmin, nasa lehzualin hma a la sawn theih ngei a rin thu a sawi a, "Bawnghnute sawngbawl theih zat litre 15,000 a nih laia an dawn zat litre 6,700 vel chiah a la ni hian bawng vulh kawngah ṭan lak thar a ṭulzia a tilang a ni," a ti.

AH&Vety Minister ṭawiawmtu, mi­nister of state Vanlalawmpuii Chawngthu pawhin thu a sawi a; MULCO Board mem­ber-te chu fakawm a tih rualin, an term an chelh chhungin hmasawnna kawng eng emaw tal neih belh tum turin a fuih a ni.

MULCO hian kum 2016-17 chhung khan bawnghnute litre 15,28,149.38 an hralh chhuak a, an hralhna aṭangin Rs. 9,24,93,545 an hmu a ni. Bawnghnute hmanga thil chi dang an siam chhuah hralhna aṭangin Rs. 1,94,15,752 an hmu bawk.