Governor-in Kawrawng lei a hawng

Lawngtlai-Diltlang-Parva kawnga Kawrawng lui kaina lei (RCC bridge) metre 72.50-a thui dawh thar chu nimin khan Governor Lt. Gen. Nirbhay Sharma-a'n a hawng.

Governor chuan, Project Pushpak hnuaia BRO/BRTF-in Kawrawng luiah lei ṭha tak an dawh chu lawmawm a tih thu a sawi a; lei dawh thar chu Mizoram mipui hnenah a hlan tih a puang a ni.

Kaladan Multi Modal Transit Transport Project (KMMTTP) vangin Lawngtlai district chu ram dang nena insumdawn tawnna kawngpui a la ni thuai dawn tih sawiin Larsap chuan, "Sorkarin hmasawnna hna a thawh chu a ṭha zawnga thawhpui zel turin mipui ka sáwm a. Lawngtlai-Diltlang-Parva road pawh siam ṭhat zel a ni a, a chhehvel mipuite’n kawng tinrenga hma an sawnpui ka beisei," a ti.

Kawrawng luia lei hi Lawngtlai-Diltlang-Parva road-a lei dawh tur ruahman 12 zinga pakhat a ni a, cheng nuai 736 sênga dawh a ni.

Project Pushpak leh BRTF hotute chuan, Lawngtlai-Diltlang-Parva road chu ṭha taka chei chhunzawm zel an tum thu leh, cheng vbc. 250 sêngin kum thum chhung chei ṭhat hna ruahmanna sorkarah an thehluh tawh thu an sawi.