Mizoram leh Assam police an inkâp; Assam police 6 thi, Mizo pakhat hliam

Nimin chawhma khan Mizoram chhung, Vairengte dáiah Assam police ṭhahnem tak an lut a, Vairengte auto-rickshaw stand-a Mizoram sorkarin a sak police duty post chu hnehchhuh tumin an bei a; buaina kal zelah nimin tlai khan state pahnih police-te inkâp a, hriat theih chinah Assam police paruk an thi a, Mizo pakhat a hliam.

Vairengte dáia inkahna thleng chungchangah hian Home minister Lalchamliana chuan nizan khan thuchhuah a siam a; a tarlan danin, Assam IGP kaihhruaina hnuaiah Cachar DC, SP, DFO leh Assam armed police 200 vel chu nimin chawhma dar 11:30 khan Vairengte auto-rickshaw stand-ah an lut a ni. CRPF-te'n an vèn lai duty post chu tihluihnaa paltlangin, Mizoram police tam vak loin an vên mek pawh an kal pèl a; Lailapur lam aṭanga Vairengte pana highway-a tlân lirthei eng emaw zat an tichhe bawk.

Assam police-in buaina an siam tih hriat a nih veleh Vairengte khaw mipuiin thil thlenna hmun an pan nghal a, Assam police nen an innawr zui a, Assam police-te chuan tear gas nen bei letin, Vairengte mi eng emaw zat an hliam a ni. Kolasib SP leh magistrate-te'n Vairengte an pan nghal tih sawiin Lalchamliana chuan, "Harsatna chinfel tuma an hmalakna chu Assam police leh official dangte'n pawisa loin, dawhkan kîlin sawipui theih an ni lo. Buaina a punlun zel a, Assam-in grenade hial an chelek zui a, tlai dar 4:50 velah silai an hmet puak ṭan ta a ni," a ti.

Assam lamin silai an hmeh puah hnuah civil mite chhan nan Mizoram police-in silai an hmet puak zui ve nghal tih sawiin Home Minister chuan, "Hetih lai hian Kolasib SP pawh CRPF duty camp-ah Assam police hotute nen an la indawr hial a ni," a ti a; Assam police-in CRPF leh Mizoram police duty-te zahpahna nei loa an paltlang lui leh buaina an siam chu pawi a tih thu a sawi.

Lalchamliana chuan, Union Home minister Amit Shah-a'n Mizoram leh Assam chief minister-te a biak ve ve hnuah Assam police-te chu an tawlh kîr chauh a, CRPF mi leh sate hnenah Mizoram police duty post an pe kîr leh niin a tarlang. Hetih lai hian, tlai dar 5:35-ah Assam police lamin puan (flag) vár an zár a, chumi hnuah silai puak a reh ta nia thu dawn a ni bawk.

Inkahnaah hian Assam police paruk an thih thu nizan khan Assam chief minister Himanta Biswa Sarma chuan a tarlang a; thil thlengin a tihnat thu te, Assam constitutional boundary venghim tura nunna hlantute a chhuan thu te, mitthi chhungte a tawrhpui thute a tarlang nghal a ni. Hetih lai hian, Vairengte Venghlun mi pakhat chu a ngalah kah fuh a ni a, Vairengte damdawi-ina hruai a nih hnuah Kolasib District Hospital panpui a ni. Ani bâk hi nizan dar 8 thleng khan hliam na deuh sawi tur an hriat loh thu, Rengkhawpui editor Lalengkima chuan Vanglaini a hrilh.

Lalchamliana chuan, Mizoram chhungah dan loa Assam sorkarin buaina an siam chu Mizoram sorkarin na taka a dem thu sawiin, "Buaina pumpelh theih a nih reng laia Assam lamin buaina nasa tak an rawn siam avanga hliam an awm hi Mizoram sorkarin pawi a ti tak zet. Tun hnuah thleng tawh lo se a duh hle a ni," a ti a; Mizoram sorkarin ramri buai chu muanawm takin dawhkan kîla chinfel a duh thu leh boruak ṭha hnuaia inbiak a nih theih nan Assam sorkarin a tih tur ṭha taka a tih a beisei thu a tarlang bawk.

Kolasib DC Dr H Lalthlangliana pawhin nimin khan thil awm dan thuthar thehdarhtute a hrilh a, "Kan rin loh deuhin an rawn kal thut a, kan police-te chu ṭha taka lo dàwr turin kan hrilh. Min hneh chhuh an tum a nih chuan engti zawng mahin kan tawlh tur a ni lo tiin kan chah," a ti a; Mizo police duty camp-te chu hum tlat tura an inhrilh thu a sawi.

Kolasib DC sawi danin, eng pawh thleng thei a nih avangin inpuahchahna felfai tak an nei a, ambulance leh medical team pawh ruat nghal a ni. Thu belhchian dâwl lo thehdarh lo tur leh Mizoram police chêtna tiṭhuanawp zawnga social media hmang lo turin mipui a ngen bawk.