Kargil Vijay Diwas hman a ni

Nimin kha Kargil indonaa India-in Pakistan a hneh champha vawi 22-na, Kargil Vijay Diwas a ni a, Assam Rifles chuan Aizawla War Memorial-ah leh an hmunah an hmang a, Governor Dr Haribabu Kambhampati-a'n a hmanpui.

Kargil Vijay Diwas hmannaah hian Kargil indonaa India sipai thite hriatrengna leh zahna lantir a ni a; War Memorial-ah hun hman hmasak niin, ram tana nunna hlântute zahna lantir nan pangpar an dah a ni.

War Memorial-a hun hman zawhah Assam Rifles Quarter Guard-ah hun hman leh a ni a; AR hotute'n Quarter Guard chanchin leh a kaihhnawih te, India sipai huaisente thil tih langsar deuh Quarter Guard chhunga tarlante an hrilhfiah.

July 26, 1999 khan Kargil War-ah India sipaite'n Kargil tlánga rálven bûkte Pakistan sipai lak aṭanga an lâk lêtna leh hnehna an chan hriatrengna atan kum tin India ramah Kargil Vijay Diwas hman ṭhin a ni.