Mizoram CM leh Assam CM Social media-ah an inchhâng

27th July, 2021

Nimina Vairengte dáia thil thleng chungchangah Mizoram chief minister Zoramthanga leh Assam chief minister Himanta Biswa Sarma te chu social media Twitter hmangin an inchháng tawn.

State pahnih chief minister-te hi tun hnaiah hmarchhak state chief minister dangte nen Union Home minister Amit Shah kaihhruaiin Shillong-ah an inhmu a, chutah chuan ramri chungchang sawi chhuah a ni.

Nimin chhuna Assam police-te Vairengte dáiah lut a, mipui nen an innawr video thehdarh pahin Zoramthanga chuan Twitter-ah, "Pu Amit Shah, he thil thleng hi khawngaihin lo en zui ta che... hei hi tihtawp vat a ṭul a ni," a ti.

CM Zoramthanga hian a hnuah Mizoram pana Mizo nupa haw, Assam lamin an lirthei an tihchhiatsak video chu Twitter-ah tarlang lehin, Assam DGP, Cachar DC leh Cachar Police-te a hriattir (tag) nghal bawk.

Assam CM Himanta Biswa Sarma chuan Mizoram CM chu Twitter hmangin a chháng nghal a, "Pu Zoramthang, Kolasib SP hian kan sipaite an inthiarfihlim hma chu mipui hian police thu an ngaichâng dawn lo tih a sawi a, hetiang boruak hnuaiah hian engtin nge sorkar hi kan kalpui theih ang?" tiin, Mizoram sorkar chu mipui thunun zo loah a puh. Assam CM hian Amit Shah leh Prime Minister Office chu hriattir zuiin, "A rang thei anga in inrawlh thuai ka beisei," a ti.

Himanta hian Zoramthanga hnenah, "Civil mite'n tiangte lekin buaina chawh chhuah an tum a, hetianga civil miin thuneihna an insiam chawp hi tihtawp a, sorkar pahnihte remna zawnga indawr ni zawk rawh se," a ti bawk.

Assam CM hian a hnuah Twitter-ah bawk Mizoram CM nen an inbiak thu tarlangin, Assam-in dinhmun ngaia awm (status quo) an pawm thu leh an ṭhenawm state-te nena inrem an duh thu a tarlang a, "A ṭul a nih phawt chuan Aizawl rawn tlawh pawh ka hnial lo," a ti.

Hei hi CM Zoramthanga chuan chhangin, "Pu Himanta, kan sawi dun ang khan Assam police-te hi mipui sahimna turin Vairengte aṭang hian inhnûkdâwk rawh se," a ti a; he thu a post-ah hian prime minister Narendra Modi leh Home minister Amit Shah te chu a hrilh (tag) nghal a ni.