Mizo tlangvalte hi Assam police hmachhawn turin kan inpeih reng - Lalduhoma

ZPM leader Lalduhoma chuan, Mizoram police-te leh Vairengte mipui a chhuah thu sawiin, "A ṭul phawt chuan Mizo tlangvalte hi Assam police hmachhawn turin kan inpeih reng a ni tih Assam Chief Minister hian lo hre rawh se," a ti.

Lalduhoma hian nizan khan thuchhuah siamin, "Ramri buaina avanga hun rei tak chhung tláwm leh zak ngawih ngawiha siam kan nih hnuah Assam sorkarin inremna ding lai 'status quo' bawhchhiain Mizoram police-te an buzáwlah an rawn luh chhuak a, chu chu duh tawk mai loin Mizo civil mi khualzinte sawisain an car-te an tihchhiatsak a, tear gas nen civil mite chu rál beiha beiin, silai hial hmet puak hmasaa an ṭang zui a ni," a ti a, loh theih lohin inkahna a awm ta tih a tarlang.

Chung lam aṭanga thupekin a zir phawt chuan Mizoram police-te chu an lo duailo hle tih a taka a lan thu sawiin Duhoma chuan, "He thil thleng hian kan pipute aṭanga kan thisena bet tlat huaisenna te, zahawmnate leh mahni inrintâwknate chu min pe thar leh a ni," a ti.

ZPM Leader chuan, hmun tin aṭanga Mizo ṭhalai rual hnam chhan tura inbuatsaih thâwmin thla a tihmuan thu sawiin, "A ṭul phawt chuan Mizo tlangvalte hi Assam police hmachhawn turin kan inpeih reng a ni tih Assam CM hian lo hre rawh se," a ti a; Mizoram police-te an chhuan tak meuh thu leh Vairengte mipui huaisenzia leh inpekna thukzia Mizoram mipuiin an hmuh nawn thu a sawi.

Ramri-ah buaina dang a awm tawh loh nan a ṭulna hmun apianga central force dah turin Lalduhoma chuan, Union Home Minister a ngen a, "Status quo-a inremna mai ni loin, ramri hi chingfel tak tak tura hma la zui turin Assam leh Mizoram CM-te ka ngen bawk a ni," a ti a; buainaa inhnamhnawih ve lo hnam dang civil mite chungah hawihhâwmna lantir turin mipui a ngen nghal bawk.