Minister-in Convention Centre sak tur a tlawh

Tourism minister Robert Romawia Royte chuan nimin khan Chite Venga Convention Centre sakna tur hmun leh sa tura ruahmanna siam dante a enfiah a, tun hnaia tuilianin Chite lei a tihchhiat a enfiah nghal bawk.

Robert Romawia Royte chuan, a bial chhunga Convention Centre ṭha sa tura Tourism department ruahmanna sorkar laipuiin a pawm leh sum eng emaw zat a rawn pe chu lawmawm a tih thu sawiin, "Centre hi sorkar department hrang hrangte leh Aizawl mipui mamawh chhànna a ni," a ti a; Tourism Ministry-in central agency scheme aṭanga project a sanction hmasak ber a nih thu a sawi.

Tourism director V Lalengmawia sawi danin, Convention Centre hi Ministry of Tourism hnuaia Scheme of Assistance to Central Agencies for Development of Tourism Infrastructure sum nuai 4,000 hmanga sak tur a ni a, WAPCOS chu a satu tur executing agency niin, an kutah first installment nuai 1,570 chu pek a ni tawh. Sum sen ngai zawng zawng chu sorkar laipui tum tur a ni a, sak zawh aṭanga kum thum thleng enkawlna senso pawh scheme aṭanga pek tur a ni.

Ruahman ang chuan, Centre-ah hian auditorium, meeting hall paruk, riahna pindan pariat, library health club, visual & audio equipment leh thil dangte a awm dawn a ni.

Robert Romawia hian a biala AMC Ward-VIII chhunga veng pathum - Armed Veng, Armed Veng South leh Chite Vengte puala Chite Venga CCCC din a tlawh nghal a; LTF hruaitute nen an inkawm a ni.