KHAWTHLIR

Oil khuahkhirh
Mizoram leh Assam ramri-ah buaina a awm avangin FCSCA department chuan nimin khan Mizorama tuialhthei - petrol leh diesel ṭum khata hralh leh lak theih zat a bithliah. Scooty-ah litre 2, two wheeler dangah litre 4, LMV, maxicab, pick-up, leh medium truck-ah litre 10, truck-ah litre 50 leh mipui mamawh phurah challan mila pek tur a ni a; búra lâk phal a ni lo.

PE-in bawhzui lo turin chah
Power & Electricity department chuan, SMS hmangin consumer-te kawlphetha tihtawpsak an nih tur thu leh a chinfel nan phone call hmang emaw email leh web link-a lut turin hriattirna a tichhuak ngai lo tih an tarlang a; chutiang message dawngte chu chî-âi lo tur leh bawhzui lo turin an chah. July 24, 2021 tlaia phone no. 09339931308 aṭanga SMS thawn chhuah chungchang pawh bawhzui lo turin an hriattir a ni.

Kuhva rah man
Serchhipa hmunpui nei Assam Rifles leh Champhaia Customs department mite chuan July 25, Pathianni khan Tlangsam leh Ruantlang inkarah kuhva rah ip 80 an man a, a neitua puh mi pahnih an man nghal bawk. Kuhva rah an man hi Rs. 16,80,000 vel mana chhût a ni.

Champhaiah MLA
Health & Family Welfare Board vice chairman Dr ZR Thiamsanga, MLA chuan nimin khan Champhai DC conference hall-ah Covid-19 chungchanga hmalakna leh ṭul dangte district official, khawtlang hruaitute leh chanchinbumite a sawipui. Nimin vek khan Champhai District Hospital a tlawh a, Oxygen Generating Plan siam mek leh hospital complex-a lei tawlh vanga harsatna awm a enfiah bawk.

Hriattir turin chah
State Referral Hospital chuan, quarantine/isolation-a awm mek zinga nau pâi, insawiselna neite chu SRH Casualty-ah inhriattir turin an chah a; phone no. 9383212171-ah biak theih a ni bawk.