Total lockdown vanga tâlbuai mipui dâwmkanna siam turin sorkar ngen

Congress Legislature Party (CLP) chuan, total lockdown avanga eizawnna kawnga tâlbuai, dinhmun harsa taka awm mekte dâwmkanna tur lian tham siam thuai turin Mizoram sorkar an ngen.

CLP chuan nimin khan thuchhuah siamin, "Total lockdown avanga eizawnna kawnga tâlbuai, dinhmun harsa taka khawsa mek Mizoram mipuite dâwmkanna tur relief programme lian tham tak duang chhuak thuai turin MNF sorkar kan ngen. Mipui thawh khawm CM Relief Fund hmang chauha ṭanpui hi sorkarin a tum tur a ni lo a, sorkar zém ngei hi mipui tan a hawng tur a ni," an ti.

Damdawia inenkawlna, thawktu lak belh leh laboratory tihchangtlun lama hmalakna a chak loh avang leh Mizoram sorkarin kawng dang zawh tur a hriat loh avangin total lockdown puan a ni leh ṭhin tih sawiin CLP chuan, "India rama total lockdown puang rei ber kan ni a, thla tam tak hna thawk thei loa kan awm tawh avangin chhungkaw tam tak sum lak luhnain a chhiat phah a ni," an ti a; thla tam tak sum lak luh nei mumal lo, in leh dawr luah man pe thei lo, ei tur leina nei lo, sumdawnna tlachhia leh loan rûl thei lo mangang an tam thu an sawi.

Congress MLA-te chuan, dinhmun harsa takah mipui an awm tawh laiin, MNF kaihhruai sorkar chuan total lockdown vanga harsatna tâwkte ṭanpuina lam a la hawi duh chuang lo tih an sawi a, "Harsatna tâwkte ṭanpuina tur pakhat mah a ruahman lo a, mipuiin sorkara chhiah leh bill kan pek turah ngaihhnathiamna a siam duh hek lo," an ti.

Congress Legislature Party tarlan danin, MLA Lalrindika Ralte-in June 24, 2021 khan Covid-19 vanga ram leh mipui an buai chhung chu electric bill leh tui bill mipui àwl rih turin Chief Minister hnenah ngenna a thlen tawh a, mahse, sorkarin an ngaihven lo. June 24 vekah NGO & All Party Meeting-in tui bill leh electric bill-ah mi rethei zawkte hriatthiamna neih ni rawh se, an tih pawh sorkarin ngai pawimawh duh lo a, in luah mante inhrethiam turin mipui a ngen zawk a ni.

Harsatna tâwk mipui chhawmdâwl nan sorkar sum hman tumna tun thlengin Mizoram sorkarin a la nei lo tih sawiin CLP chuan, "Sorkar hi mipui tana ding a ni a, sorkar hotute pawh mipui tana thawk tura thlan an ni. Mahse, MNF sorkar hi MNF party tan chauha ding ang maiin a khawsa lui tlat a, mipuiin ei leh bâra harsatna nasa tak kan tawh mekah hmalak tumna a nei miah lo a, hriatthiam harsa kan ti hle a ni," an ti.

Congress MLA-te chuan, Mizoram sorkarin Covid-19 léng karah pawh Mizoramin sorkar laipui aṭanga sum hmuh tura a beiseite a hmu ṭha tawk tih Finance commissioner Vanlalchhuanga'n July 22, 2021-ah a sawi tih tarlangin, "Mizoram sorkar hi sum leh paia tâlbuai lutuk turah kan ngai lo," an ti. Mipui chhawmdawlna atana ruahmanna siam kawngah theihtawp chhuaha sorkar puih an inhuam thu an sawi bawk.