COVID-19: Mizoram dinhmun : Hripui vei 1,369 hmuh belh a ni

July 25, Pathianni khan Mizoramah Covid-19 vei mi 547 hmuh chhuah a ni a, swab sample endik rûnpuia hmuh chhuah mi 822-te nen positive result nimina tarlan chu mi 1,369 an ni. Nimin khan hripui laka fihlim tawh mi 212 chhuahtir an ni a, mitthi pakhat a awm belh.

Covid-19 vei Pathian-nia hmuh tharte chu mipa 263 leh hmeichhia 284 niin, Aizawla veng 59 leh khaw dang 23-a mite an ni a; TrueNAT-PCR hmanga hmuh chhuah mi 14 leh RAT hmanga hmuh chhuah mi 533 an ni. ZMC laboratory-ah sample endik a ni lo.

Nimina result tih­chhuahah hian July 21-24 chhunga Aizawl leh khaw danga swab sample endik rûnpui result tihchhuah nghal a ni a; July 20 bika hmuhte chu a hmain tihchhuah a lo ni tawh a, Tuirial bika hmuh chhuahte telh a la ni lo thung.

IDSP record angin, Mizoramah Covid-19 vei mi 33,452 hmuh chhuah a ni tawh a, mipa 17,986 leh hmeichhia 15,466 an ni. Nimin tlai dar 5 thleng khan mi 23,784 (71.09%) chhuahtir an ni tawh a, mi 137 (0.42%) thi tawhin, enkawl mek mi 9,531 (28.49%) an awm.

July 25, Pathiannia swab sample endik dan chu - TrueNAT hmangin district parukah 110 leh RAT hmangin district 10-ah 1,700 a ni a, a vaiin sample 1,810 (mipa 991 leh hmeichhia 819) niin, chu'ng aṭanga hripui vei hmuh chhuah 547 chu 30.22% a tling. Positive percentage hi TrueNAT-ah 12.72% leh RAT-ah 31.35% a ni. Pathiannia district-a Covid-19 positive hmuh dan chu - Aizawl district-ah mi 444, Mamitah 27, Kolasib, Lawngtlai leh Saitualah 20 ṭheuh, Siahaah 13, Serchhipah pahnih leh Lungleiah mi pakhat an ni.

Hripui vei hmuh thar 1,369-te chu natna lang chhuak 717 leh lang lo 652 an ni a; tualchhunga kái vek niin, state páwn aṭanga tun hnaia rawn lut an awm lo a, kàina chin hriat loh mi 1,123 an awm. Sample endik rûnpuia hmuh tel loa mi 547 hmuh chhuah zingah kum 80 chung lam panga an awm a, an zinga pahnihin symptom an nei a, a upa ber chu kum 91 a ni. Nausen kum khat tling lo panga an awm a, a naupang ber chu ni 19-a upa a ni.

July 21-24 chhunga Aizawla veng 15 leh khaw dang pahniha sample endik rûnpuia hmuh chhuah mi 822-te chu mipa 367 leh hmeichhia 455 an ni a, symptom nei mi 315 an awm. Kum 80 chung lam mi paruk awmin, a upa ber chu kum 91 a ni a; nausen kum khat tling mi panga an awm bawk. Nimin khan tlai dar 5 thlengin hripui laka fihlim tawh mi 212 chhuahtir an ni a; Aizawl district-ah mi 45, Kolasib district-ah 44, Mamit district-ah 43, Lunglei district-ah 41, Siaha district-ah 33, Serchhip district-ah pali leh Champhai district-ah pahnih an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 8,895 hmuh chhuah a ni tawh a, TrueNAT-PCR hmangin 2,045, RAT hmangin 22,511 leh Guwahati-ah pakhat hmuh chhuah a ni tawh. IDSP tarlan danin, July 25, 2021 thlengin Mizoramah swab sample 5,91,684 endik a ni tawh a, chu'ng aṭanga Covid-19 positive hmuh tawh zat 33,452 chu 5.65% a ni. Hripui vei hmuh tawh zinga mi 29,273 chu Mizoram chhunga kái chhâwng an ni a, mi 4,179 chu Mizoram páwn aṭanga an rawn luh hnua hmuh chhuah an ni.