Zirlai pawlte'n báng turin CM leh Home Minister an phût

Zirlai pawl pahnih, MZP leh MSU-te chuan thuchhuah siamin, ramri chungchangah Mizo mipui duh dan anga che vat turin Mizoram sorkar an phût a; chief minister Zoramthanga leh Home minister Lalchamliana te chu an mawhphurhna hlen zo loah puhin, báng turin an phût bawk.

MZP chuan thuchhuah siamin, Assam police-te'n rálthuam famkima inthuam a, Mizoram chhunga buaina an siam chu thinurthlak a tih thu leh, Mizoram IR camp luhchhuaha an luah zui chu mak an ti a, pawm harsa an tih thu an tarlang.

Assam-in Mizo mipui tham lo taka an luhchilh leh Mizoram chhunga huangtau taka rálthuam nen an che chu chhàn lêt ve a hun tawh tak zeta an hriat thu sawiin, "Ram humhalh kawnga Mizoram sorkar hmalakna hi kan duhkhawp lo tak zet a, Mizoram sorkarin Assam sorkar a ngam lo a nih chuan Mizo ṭhalaite an che chhuak zel dawn. Vairengtea Mizo IR camp hi Mizoram sorkarin a rang thei ang bera a chhuh lêt lo a nih chuan CM Pu Zoramthanga leh Home minister Pu Lalchamliana te hi báng turin kan a duh," an ti.

Mizo Students’ Union (MSU) Gen.Hqrs chuan nimina Assam sorkar chêt dan chu thinrimthlak an tih thu sawiin, "Mizoram leh Assam ramri chinfel loha a awm reng hi pawi kan ti a, Mizo mipui duh dan anga Mizoram sorkar chu che vat turin kan phût. Ramri buaina hi an chingfel thei lo a nih chuan Chief Minister leh Home Minister hi báng ngam turin kan ngen a ni," an ti.

MSU chuan, Assam state chhung, a bik takin Silchar-a awmte sahimna ngaihtuah tur leh Mizoram House leh Silchar Mission Compound-a venhimna ṭha tak dah turin Mizoram sorkar an ngen bawk.