BJP-in CM leh HM báng turin an phût

BJP, Mizoram Ṭhalai chuan thuchhuah siamin, ramri chungchang avangin chief minister Zoramthanga leh Home minister Lalchamliana te chu báng turin an phût a, "Mizoram sorkar hian Vairengte mipui thlazâr hnuaiah awm tum tawh suh se," an ti.

BJP ṭhalaite chuan, "Assam sorkar chuan kan IR police riahbûk sak ngei luah lut turin an police chakna hmanga thamlo taka Mizoram police-te an hnawt chhuak hi a ná kan ti a, a tlàwm thlak kan ti hle," an ti a; hmarchhak state CM meeting zawh hlim hlawtah ramri-ah buaina tun hmaa la thleng ngai lo a awm nghal chu mak an tih thu leh CM Zoramthanga thiam loha an ngaih thu an sawi.

State ramri chu state sorkar hmalakna tur a nih laiin, Vairengte mipui, civil mite vèn tur leh inrawlhna tura Mizoram sorkarin a ngai chu pawi an tih thu sawiin BJP Ṭhalai chuan, "Tunah chuan Vairengte khaw mipui huaisenna avanga kan ramri pawh la hum chauh kan ni a tih theih. Assam lam chu khua leh tuite Assam sorkarin a veng hneh a, sorkar kutah an him hle a ni," an ti.

Mizoram BJP ṭhalaite chuan, nimina Vairengte dáia buainaah Assam police-te dang turin Vairengte mipuiin hma an hruai tih sawiin, "Kan police huaisen tak takte dâwih taka awmtirtu sorkar hi kan dem tak zet a, Mizoram Chief Minister leh Home Minister hi a rang thei ang bera báng turin kan phût a ni," an ti a; Mizoram sorkar chu zah nachang hre turin an chah bawk.