District tinah Covid-19 damdawi-in Pakhat tal siam turin sorkar phût

ZPM Ṭhalai chuan, Mizoramah kum khat chuang Covid-19 a lèn hnuah pawh hripui veite enkawlna damdawi-in Aizawl district-ah chauh a awm avangin, district tinah Covid-19 damdawi-in pakhat tal a rang lama siam turin Mizoram sorkar an phût.

ZPM ṭhalaite chuan thuchhuah siamin, tun thlenga hripui veite enkawlna damdawi-in Aizawl district-ah chauh a awm chuan Zoramthanga kaihhruai sorkarin mipui nunna a hlut tâwk lohzia a tichiang hle tih an tarlang a, "Health Minister hian mawh lian tak a phur a, a department chan a enkawl zo thlâwt loah kan ngai," an ti.

Hripui dona leh hri laka mipui himna turah Mizoram sorkarin a theihna chanve pawh a la hmang loa an ngaih thu sawiin ZPM Ṭhalai chuan, "Health Minister inthlahdah vang liau liau a ni," an ti a; sorkar laipui aṭanga Mizoram sorkarin sum a hmuh ṭhin pahnih - Post Devolution Revenue Defecit Grand leh Share of Central Tax-ah beisei zat a hmuh reng thu leh Share of Central Tax-ah phei chuan beisei aia tam sum a hmuh thu an tarlang.