CM-in thihna thleng pawi a ti : 'Assam chêt dan kan dem tak zet' - Zorama

Chief minister Zoramthanga chuan, July 26, Thawhṭannia Vairengte dáia Mizoram leh Assam police-te inkahnaa thi leh hliam an awm chu pawi a tih thu a sawi a; Assam sorkar chêt dan chu a demawm tak zet a tih thu leh buaina thlen chungchangah Assam chu kutthlaktu hmasa an nih thu a sawi bawk.

Phai lam media-te'n an kawmnaah CM Zoramthanga chuan, "Mizoram chhung rawn luhchilha Assam sorkar chêt dan hi kan dem a, he mi kal zela pumpelh theih reng leh ṭul lo taka tawrhna thleng hi Mizoram sorkar chuan pawi a ti tak zet a ni," a ti.

Zoramthanga chuan, Vairengte dáia thil thlen dan sawiin, "July 24-ah Union Home Minister kaihhruaina hnuaiah kan inbia a, chutah chuan ramri buaina awmte hi Home Ministry kaihhruaina hnuaiah chief minister-te'n ngaihtuah turin tih a ni. Ṭha takin kan haw a, nimahsela, rin loh takin July 26-ah Assam lam chu an IGP leh Cachar DC hoin police 200 chuang an rawn thawk chhuak a, Mizoram chhungah ngei rawn lutin, CRPF camp an rawn luh chhuah a ni," a ti a; Assam police-te chuan CRPF leh Mizoram police-te chu an tam hneh thu a sawi.

Chief Minister chuan, Assam police-te'n an rawn luhchilh hnuah pawh Mizoram lamin an bei lêt mai lo tih sawiin, boruak ṭha taka chinfel tumin an dawr zui tih a sawi a, "Hetianga kan indawr tawn mek lai hian Assam lamin an rawn bei hmasa ta a ni. A tirah grenade an rawn vawm a, chumi hnuah sub machince gun leh rifle hmangin an rawn kâp zui ta a ni," a ti.

Assam chief minister Himanta Biswa Sarma-a'n Mizoram police-te chu Assam police beihna atana light machine gun hmanga a puhna chungchanga zawhna chhangin Zoramthanga chuan, "Inkahna a thleng tawh a, a tawn tawnin silai awm angte an hmang tawh a ni ber. Machine gun leh AK-47 rifle-te pawh an kawl ve ve a ni," tiin, Mizoram lam chauh ni lo pawhin silai ṭha an hman thu a sawi.

Inkahna a thlen hnuah Union Home minister Amit Shah kaihhruainain Assam CM nen an inbiak thu sawiin CM Zorama chuan, "Amit Shah ruahman angin Assam police-te chu tawlh kîr a, CRPF duty post chu CRPF kuta hlan lêt tura tih a ni a, chu chu keini pawhin ṭha kan ti. Duty post hi CRPF-te'n an luah zui leh tawh a ni," a ti.

Ramri buai chinfel hlen dan tur zawhna chhangin Chief Minister chuan, "Union Home ministry kaihhruaina hnuiah harsatna hi chinfel kan duh. Assam hian Arunachal Pradesh, Nagaland leh Meghalaya nen pawh ramri buai an nei a, ṭha taka chinfel thuai kan duh," a ti a, sorkar laipui kaihhruainaa dawhkan khat kîla chinfel a duh thu a sawi a ni.