Home Minister-in inkahna hmun a tlawh

Home minister Lalchamliana chuan nimin khan Vairengte dái, auto-rickshaw stand bula Mizoram police duty camp a tlawh a; Mizoram-Assam ramri-ah police dah belh nghal a nih thu a sawi.

Lalchamliana chuan, ramri buaina chu tharum tel loa chinfel tum a nih mek laiin Assam police-te chêtna avangin loh theih loin tharum nen inchhàn a ngaih tâk thu leh Assam lamah thi an awm chu pawi a tih thu a sawi a, "Assam police rawn luh tumna hmun ṭhenkhat Saihapui-V, Aitlang leh Zophaiahte Mizoram police a ṭul anga dah zel a ni a, Saihapui-V khawtlang hruaituten vawiina an lo thlen angin police dah belh nghal a ni," a ti.

Home Minister chuan, ramria buaina chungchangah Vairengte khawtlang mipui inpekna leh huaisenna fakawm a tih thu a sawi bawk.

Ramri vengtu CRPF-te'n Mizoram lo luta Mizo IR camp luahlan tumtu Assam police chetna lakah hmalakna an nei lo nia sawi a ni a; hemi chungchangah hian Home Minister chuan CRPF inspector general Sarbjit Singh chu hma la turin a hrilh.

Home Minister ṭawiawmtu minister of state K Lalrinliana chuan, Assam nena ramri buaina avangin ei leh bar, gas leh tuialhtheiah harsatna a awm loh nan ruahmanna hrang hrang an siam thu a sawi a, Mizoram sorkar kudamah mipui thla hnih ei buhfai a awm meka ngaih a nih thu a sawi.

Lalchamliana leh amah ṭawiawmtu minister leh MLA-te chuan ramri buaina chungchanga a ṭul apianga hman turin Vairengte khawtlang hruaitute hnenah sum an pe a ni.

Home Minister hi minister dang pathum - Lalchhandama Ralte, Lalruatkima leh Robert Romawia Royte te bakah, MLA pathum - Lalrinsanga Ralte, H Lalzirliana leh C Lalmuanpuia ten an ṭawiawm a; John Neihlaia, IGP leh police hotu dangte an tel bawk.