Mizoramah lockdown chhungin hripui vei mi 29,575 hmuh a ni

Mizoramah kumin April 20 aṭangin lockdown (inkhuahkhirhna) kalpui ṭan a ni a, July 26, 2021 thlenga inkhuahkhirh ni 99 chhungin Mizoramah Covid-19 vei mi 29,575 hmuh chhuah a ni tawh.

Kuminah April thla aṭangin Covid-19 thawh hnihna Mizoramah a lèn avangin April 20, 2021 aṭangin lockdown kalpui ṭan a ni a, lockdown ṭan hma, April 19 thlenga Mizorama hripui vei hmuh chhuah tawh zat chu 4,995 a ni.

Inkhuahkhirhna hi Aizawl bikah chuan chhum lo chat loin tun thlengin kalpui a la ni ta zel a, vawiin (July 28) hi ni 101-na a ni. July 26 thlengin Mizoramah hripui vei 34,570 hmuh chhuah a ni tawh a; lockdown lai bik April 20 - July 26 (ni 99) chhunga Covid-19 positive hmuh chhuah zat chu 29,575 tihna a ni.

Lockdown ni 99 chhung bika hripui vei hmuh chhuah hi chawhrualin ni tin mi 298 chuang hret (298.77) an awm ang a ni.

Aizawl khawpui bikah chuan July 1 aṭangin total lockdown puan leh niin, kalpui mek a ni a; district khawpui dang ṭhenkhatah pawh total lockdown puan a ni. July thla bikah hian July 26 thlengin hripui vei mi 14,078 hmuh chhuah a ni tawh a, ni khata hmuh chhuah zat chawhrual chu mi 541 chuang hret (541.46) a tling.

Nimin zinga Covid-19 positive result tihchhuahah hripui vei hmuh thar 1,118 an awm a, India ramah Mizoram aia hripui vei hmuh chhuah thar tamna state pasarih chiah a awm. Mizoram aia hmuh chhuah thar tamnate chu - Kerala (11,586), Maharashtra (4,877), Tamil Nadu (1,785), Odisha (1,637), Andhra Pradesh (1,627), Karnataka (1,606) leh Assam (1,528)-te a ni a; state dang 20 leh union territory pariatte chu Mizoram aia hmuh chhuah tlemna vek a ni.

Nimina Covid-19 positive result a chhuah hnuah hripui vei enkawl mek (active case) zat chu 10,522 a ni a; India rama state 28 leh UT pariat zingah Mizoram aia active case tamna state pakua a awm a, chun'gte chu - Kerala (1,37,318), Maharashtra (92,088), Karnataka (23,080), Tamil Nadu (22,762), Andhra Pradesh (21,748), Odisha (16,230), Assam (14,929), West Bengal (11,566) leh Manipur (10,524)-te a ni.

Covid-19 positive hmuh chhuah tawh zat aṭanga chhûta active case awm zatah Mizoram sang berin, 30.44% a ni a, a sang fál hle. Mizoram dawttu chu Sikkim (11.72%) a ni a, Manipur (11.24%) chu pathumna a ni. Active case tamna ber ni mek Kerala-ah chuan active case percentage chu 4.18% chiah a ni thung.