District tinah sample endik rûnpui kalpui turin Hawla'n sorkar a ngen

Mizoram Pradesh Congress Committee (MPCC) president Lal Thanhawla chuan nimin khan thuchah a tichhuak a; Aizawl khawpui pumpuiah leh district zawng zawngah swab sample endik rûnpui kalpui a nih theih nan Mizoram sorkarin hma la se a duh thu a tarlang.

Lal Thanhawla chuan, mipui náwlpui sample endik rûnpui neih chu June 7, 2021 khan a rawt tawh tih tarlangin, "Tunah AMC veng ṭhenkhata sorkarin a kalpui ta hi lawmawm ka ti a. Aizawl pumpuiah leh Zokhaw hmun tin, district zawng zawngah kalpui a nih theih nan Mizoram sorkar hian hma la se ka ti khawp mai," a ti.

Covid-19 vei pun chhanah mipui demna awká a awm lek lek ṭhin tih sawiin Lal Thanhawla chuan, "Mizote hi kaihhruai nuam, thuawih thei tak kan ni. Lockdown hi a damdawi ṭha ber emaw kan la ti hi chu a dikhlel deuhin ka hria. Mirethei leh harsa zawkte chhâwk zângkhaina sorkarin a ruahman si lo a, chuvangin, tun aia chak zawka test rûnpui Mizoram puma nei turin sorkar ka ngen a ni," a ti a; state dang tam takah nun dan pangngaia an kal tawh thu a sawi.

MPCC President chuan, state tam takah chuan RT-PCR negative certificate nei lote an state-ah luh an phal lo tih sawiin, Mizoram lut turte pawh RT-PCR negative certificate neite chauh luh phal ni se, chu chuan nasa takin hri donaah a puih a beisei thu a sawi a, "Sikul kal loh lai pawha zirtirtu lak belh theih a nih chuan, district tina Covid donaa thawktu indaih lohna phuhru tur leh nunna chhan tura hriselna lama thawktu lak belh hi a ṭul tak zet a, Chief Minister leh Health Minister hian ngaih pawimawh hmasakah nei se a duhawm ngawt mai," a ti.

Congress President chuan, sorkarin himna tura dan a siamte leh local/village task force-te thu zâwm thiam tur leh sorkar thawhpui thiam turin mipui a chah bawk.