MNF-in ṭangrual turin mipui an sáwm

MNF party hruaitute chu nimin khan an senior vice president Tawnluia, deputy chief minister hoin a pisaah ṭhukhawmin, Mizoram leh Assam ramri bula July 26, Thawhṭannia buaina thleng chungchang an sawiho a; Mizoram humhim nan theihtawpa ṭangrual zel turin Mizoram mipui an sáwm.

Ṭhutkhawmah hian Assembly Speaker, minister-te leh Deputy Speaker-te bakah, MNF National Core Committee leh Political Affairs Committee member-te an tel a ni.

MNF hruaitute thukhawm chuan thuchhuah siamin, "July 26, 2021-a Assam police hoin Vairengtea IR camp te, CRPF camp-te palzut hnua rawn bei thut a, rawn laa Vairengte auto-rickshaw stand lo lut zel a, mipuite kut an thlak leh silai an hmet puak hmasa kha kan dem tak zet a ni," an ti.

Ram humhalhna atana Chief Minister hmalakna chu fakawm an tih thu sawiin, "Home Minister-in puitling taka hma a laknate hi kan fak a, kan ram humhalhna tura Vairengte mipui, páwl hrang hrangte leh Mizoram ramria khaw awm zawng zawng mipui inpekna a ropuiin kan fak tak zet. Mizoram police-te ram tana an huaisenna leh inpekna a ropui kan ti a, an camp ngaia an awm leh thei hi chhuanawm kan ti tak zet a ni," an ti. MNF chuan Pathianin Mizote tana ram a pek chu Pathian hmachhuanin humhim zel an tum thu an tarlang bawk.