Minister-te'n Saihapui-V an tlawh

Minister pahnih - Lalchhan-dama Ralte leh Lalruatkima bakah, MLA Lalrinsanga Ralte te chuan nimin zing khan Saihapui-V khuaa Mizoram police duty-na hmun an tlawh a, khawtlang hruaitute nen an inkâwm.

Minister-te hian bomb puak avanga Saihapui-V Primary School, hun rei tak rauhsan tawh chu ramri hrúla awmte'n ṭangkai taka an chhawr chhunzawm theih nan thawm ṭhat dan tur a hmunah an en nghal bawk.

School Education minister Lalchhandama Ralte chuan, ramri khua tihhmasawn chu Mizoram sorkarin a ngaih pawimawh thu sawiin, "Saihapui-V P/S, mi tu tih hriat lohte'n bomb an tihpuah avanga hun rei tak rauhsan tâk chu heti lai hmuna awmte'n ṭangkai taka an hman theih nan thawm ṭhat mek a ni," a ti.

Lalchhamdama Ralte chuan, hripui léng avangin zirna-inte khâr rih ni mah se, a remchan veleha zirtirna kalpui nghal a nih theih nan Saihapui-V P/S bakah office leh inthiarnate sak ṭhat dan tur ruahman a nih thu a sawi a; zirtirtu pawh ngaihtuah nghal a nih tur thu a sawi bawk.

RD minister Lalruatkima chuan, Saihapui-V khuaa Mizo IR duty post-a awmte'n a ṭul apianga an hman turin Rs. 10,000 a pe a; inpekna thinlung nen ramri ven hna thawk zel tur leh Saihapui-V leh Phainuam khawtlang nena thawhho thiam zel turin a chah.