CYMA-in ṭangrual turin an ngen

July 26, Thawhṭannia Mizoram leh Assam ramria buaina leh inkahna thleng chungchang chu Thawhṭanni zan khan Central YMA chuan an ngaihtuah a; thuchhuah siamin nghalin, ramin hun harsa a tawh lai chu ṭanrual hun a nih avangin, political party leh pawl dangte chu thangṭhat lâk tum lo tur leh indem nan hmang loa ṭangrual tlat turin an ngen.

Central YMA hian buaina chhuahna hmun tlawh turin CYMA office bearer pahnih leh CEC member pakua an thlang chhuak nghal a; chu'ng mite chuan Thawhṭanni zan vek khan Vairengte an pan nghal a ni.

Central YMA ngennate
1. Mizoram leh Assam ramri buaina thleng mek chungchanga Mizoram sorkar leh Vairengte khawtlang hmalaknaah lawmthu kan sawi. Ralthuam keng Assam police-te huaisen taka lo hmachhawntu Vairengte khawtlang leh Mizoram police kan chhuang tak zet a ni.
2. Ramri buaina vanga harsatna thleng thei hrang hrangte hmachhawn tur leh mamawh sem zâi leh renchem zawnga hma la turin Mizo mipui kan ngen.
3. Ramri buaina vanga thil man tisang lo tur leh chheprelh lo turin kan inngen.
4. Ramri buaina vanga Mizoram chhunga hnam dang awmte'n kut palh an tawrh lohna turin Mizo mipuite'n dawhtheihna i lantir ang u.
5. Ramin hun harsa kan tawh mek lai hi ṭanrual hun tak a nih avangin political party leh pawl dangte'n thangṭhat lak tum mai lo tur leh indem mai lo a, ṭangrual tlat turin kan inngen e.