COVID-19: Mizoram dinhmun : Hripui vei 1,118 hmuh belh a ni

July 26, Thawhṭanni khan Mizoramah Covid-19 vei mi 1,118 hmuh chhuah a ni a, hmuh tam ber ní nih bakah, hripui vei enkawl lai (active case)-in sing khat a tlin (10,522) vawi khatna a ni. Nimin khan hripui laka fihlim tawh mi 165 chhuahtir an ni a, mi pathum an thi.

Covid-19 vei hmuh tharte chu mipa 543 leh hmeichhia 575 an ni a, ZMC laboratory-a hmuh chhuah 311, TrueNAT-PCR hmanga hmuh 52 leh Rapid Antigen Test hmanga hmuh 755 an ni.

Hripui vei hmuh thar 1,118-te chu natna lang chhuak 537 leh lang lo 581 an ni a; tualchhunga kái 1,107 leh state páwn aṭanga tun hnaia rawn lut 11 niin, tualchhunga kái zingah kàina chin hriat loh mi 505 an awm.

Mi 1,118-te chu Aizawla veng 74 leh khaw dang 54-a mite an ni a; Aizawlah veng (local council) 83 a awm a, LC pakuaah chiah hripui vei hmuh thar an awm lo tihna a ni. Lunglei khawpuia veng 11 leh Kolasib khawpuia veng pariatah hmuh chhuah a ni bawk.

IDSP record angin, Mizoramah Covid-19 vei mi 34,570 hmuh chhuah a ni tawh a, mipa 18,529 leh hmeichhia 16,041 an ni. Nimin tlai dar 5 thleng khan mi 24,076 (69.64%) chhuahtir an ni tawh a, mi 140 (0.40%) thi tawhin, enkawl mek mi 10,354 (29.96%) an awm.

July 26, Thawhṭannia swab sample endik dan chu - ZMC laboratory-ah Aizawl leh Serchhip district-a mi 2,057, TrueNAT hmangin district 10-ah 404 leh RAT hmangin district 11-ah 3,931 a ni a, a vaiin sample 6,392 (mipa 3,303 leh hmeichhia 3,089) niin, chu'ng aṭanga hripui vei hmuh chhuah 1,118 chu 17.49% a tling. Positive percentage hi ZMC-ah 15.11%, TrueNAT-ah 12.87% leh RAT-ah 19.20% a ni.

Thawhṭannia district-a Covid-19 positive hmuh dan chu - Aizawlah mi 809, Kolasib-ah 84, Lawngtlaiah 71, Lungleiah 67, Mamitah 49, Champhaiah 25, Serchhipah pasarih, Saitualah pathum, Siahaah pahnih leh Khawzawlah pakhat a ni. Hripui vei hmuh thar 1,118 zingah naupang kum tling lo 300 chuang awmin, an zingah symptom nei 100 chuang an awm a; nausen kum khat tling lo 10 vel awmin, a naupang ber chu ni 5-a upa a ni. Kum 60 chung lam 70 chuang awmin, an zingah symptom nei 30 chuang an awm a; kum 97 mi leh kum 100 mi pakhat ve ve an tel.

Nimin khan tlai dar 5 thlengin hripui laka fihlim tawh mi 165 chhuahtir an ni a; Aizawl district-ah mi 118, Mamit district-ah 19, Kolasib district-ah 14, Siaha district-ah pasarih, Lawngtlai district-ah panga leh, Lunglei leh Champhai district-ah pakhat ve ve an chhuak.