Hripui vangin mi 3 thih belh

Nimin khan tlai dar 5 thlengin Mizoramah Covid-19 vangin mi pathum an thi a, sorkar chhinchhiah angin Mizorama hripui vanga thi chu mi 139 an ni tawh.

Covid-19 vei enkawl lai Lianchhungi (68) w/o K Lalhmuaka, Thingdawl Venglai chu nimin zing dar 5:10 khan Kolasib District Hospital-ah a thi a, nimin chawhma dar 11 khan community hall-ah vui a ni. Lianchhungi hi Covid-19 positive a ni tih July 16, 2021-ah hmuh chhuah niin, July 24 khan damdawi-inah dah luh a ni a; hripui a kai hma hian natna dang nei sa a nih thu Thingdawl Venglai YMA hruaitute chuan an sawi.

Lalmalsawmi (45) d/o R Thanṭhuama, North Chawnpui pawh nimin zing dar 7:40 khan Kolasib District Hospital-ah a thi a, hripui vanga thi 139-na niin, nimin chhun dar 1 community hall-ah vui a ni. Lalmalsawmi hi natna benvawn nei sa a ni a, Covid-19 positive a ni tih July 21, 2021-ah chhuah niin, July 22 khan damdawi-inah enkawl ṭan a ni.

Nimin tlai dar 5:50 khan F Taiṭhuama (78) f/o F Lalnunthara, Central Jail Veng chu State Referral Hospital-ah a thi a, vawiin dar 10-ah vui a ni ang. Covid-19 positive a ni tih July 24 khan hmuh chhuah a ni a, SRH-ah enkawl nghal a ni.