Party hrang hrangte'n Assam an dem

July 26, Thawhṭannia Mizoram chhung, Vairengte dáia buaina thleng chungchangah Mizorama political party hrang hrangte chuan nimin khan thuchhuah an siam a; Mizo mipuite ṭangrual zel turin an sáwm.

MIZO NATIONAL FRONT
Rorel lai MNF party chuan, ramria Mizoram sorkar chet dan leh Assam sorkar chêt dan na taka a dem te, Vairengte mipui chet dante chu lawmawm an tih thu leh, Assam police-te chêt dan chu thinurthlak an tih thu leh an dem thu an tarlang.

MNF chuan, ram chhan nana chief minister Zoramthanga leh Home minister Lalchamliana te hmalakna lawmawm an tih thu sawiin, "Kan chhuang em em a ni. Kum 20 zet India pawh do ngam tawh Pu Zoramthanga kaihhruai MNF sorkar hi Mizoram sorkar kan hrawn tawh zawng zawngah ramri chungchanga hma la thui ngam ber leh huai ber, la kal thui ber a ni," an ti a, thlamuanthlak an tih thu an sawi.

Assam-in hmarchhak state dang - Meghalaya, Nagaland leh Arunachal Pradesh-te nen pawh ramri buai an nei mek tih sawiin MNF chuan, "Mizoram ramri bik hian tihbuai a tâwk fo a, Assam sorkar hi kan ramriah buaina rawn siam fo tawh lo turin kan duh hle a ni tih hi Assam sorkar leh police-te hian lo hre tawh rawh se," an ti.

MNF party chuan, ramri buai chungchang chu party leh páwl sawi lo leh thangṭhat lak bik tum nan hman lo tum lo turin pawl tin an ngen a, "Kohhran thlengin pheikhai rual taka sorkar thâ tichaka ṭangho turin kan ngenin kan sáwm a ni," an ti a; mahni duh thu leh rin thu te, thu belhchian dâwl lo leh ram páwn mite laka Mizote hmai tibâl thei leh tihmingchhe thei thu leh video-te thehdarh lo turin mi tin an ngen a ni.

MNF tarlan danin, ramri buai enfiah turin July 26 khan minister pahnih Lalruatkima leh Lalchhandama Ralte bakah, bialtu MLA Lalrinsanga Ralte te chu CM ruahman angin Vairengteah an kal nghal a, nimin zing khan Home minister Lalchamliana, minister Robert Romawia Roy leh MLA pahnih Dr K Pachhunga leh H Lalzirliana te an kal leh bawk.

ZORAM PEOPLES' MOVEMENT
ZPM party chuan, Mizoram leh Assam police-te rálthuama innawr a ngai leh thisen a luang hial chu vanduaithlak an tih thu sawiin, Assam sorkar chu inremna ding lai ‘status quo’ bawhchhetu an nih thu an tarlang a, "Silai hial hmet puak hmasaa an ṭan zui avangin loh theih lohin inkahna a awm ta a ni. Mizoram sorkarin ramri veng tura a dah CRPF camp leh IR camp Assam police-in IGP hoa an rún ngawt kha a mâwlmang a, a intham loh thlak a, danpui zah lohna nasa tak a ni," an ti.

Assam sorkar huaisenna nena chháng lettu Mizoram sorkar fakawm an tih thu sawiin ZPM chuan, "Ram leh hnam chhan nana Mizoram police leh Vairengte khawtlang chêt dan kan chhuang tak zet a, an huaisenzia leh inpeknate hi hriat reng a ni tawh ang," an ti a; Mizoram hmun hrang hranga ṭhalai rual hnam chhan tura inbuatsaih thawmin thla a tihmuan thu an sawi.

Ramin hun harsa a tawh lai chu ṭanrual hun a ni tih sawiin ZPM chuan, "Buaina hian eng chen nge a awh dawn a hriat loh a, mi tinte inrenchem zual ila. Zuartu leh leitute'n chhehrelh rûk nei lo ila, 'Sem sem dam dam, ei bil thi thi' tih hun tak a ni," an ti.

ZPM party chuan, tharum thawhna a thlen tawh loh a, ramri chinfel dan dap turin thuneitute an ngen a; Mizoram chhunga Assam police-te'n civil mite bungrua an tihchhiatsakte chu zangnadawmna pe turin Assam sorkar an phût. Ramri veng tura sorkar laipuiin a dah CRPF-te'n Assam police-te an lo dang thei lo chuan sorkar laipui beng thleng ngei se an duh thu an sawi bawk.

MIZORAM BJP
BJP, Mizoram Pradesh chuan, Union Home Minister hoa hmarchhak chief minister-te an ṭhutkhawm hnu lawka Assam sorkar a che ta mai chu an dem thu an tarlang a, "Thamlo taka Assam sorkar leh police-te'n min rawn beihna Vairengte khawtlang leh Mizoram police-te'n Mizoram chhan nan huaisen taka an chháng lêt hi kan chhuang tak zet a ni," an ti.

BJP chuan, Mizoram police-te chu tun hma aṭanga an hriat tawh angin, chung lam thupekin a zir phawt chuan an huaisen a, India rama police ṭha ber zinga mi an nih thu an sawi a; Home minister Lalchamliana'n ramri aṭangin inchi khat pawh an tawlh dawn lo tih a sawi chu an thlàwp tlat thu leh Mizoram sorkar chu Mizoram ramri chinfel a nihna kawnga a hmalakna reng rengah an thlawp zel dawn thu an sawi bawk.

CONGRESS ṬHALAI
Congress party ṭhalaite chuan, Assam CM Himanta Biswas Sarma sorkarin a tirh angin Assam police-te'n Mizoram chhungah buaina siam tih tarlangin, "Mizorama Assam police-te'n an nunna an chân phahnaah hian Himanta Biswas Sarma hi a mawhphurtu dik tak a ni," an ti.

MPYCC chuan, Assam sorkar leh police chet dan an dem thu an tarlang rualin, Mizoram police-te'n an chhan let dan leh Vairengte mipui chet dan fakawm an tih thu an sawi a; Thawhṭannia buaina avanga vanduaina tâwka thi an awm chu pawi an tih thu leh mitthi chhungte an tawrhpui thu an tarlang bawk.

Hetih lai hian, ZPM Ṭhalai chuan English-in thuchhuah an siam a; Assam CM Himanta Biswas Sarma chu hmarchhak state dangte laka buaina siamtu a nih avangin, CM a nihna aṭanga paih ni se an duh thu tarlangin, CM aṭanga paih turin BJP hruaitute an ngen. District lama political party ṭhenkhat pawhin thuchhuah an siam bawk.