Zirlai pawlte'n Assam chêt dan an dem Mizoram police leh Vairengte mipui an fak

Zirlai pawl pahnih - MZP leh MSU-te chuan thuchhuah siamin, Assam sorkarin July 26, Thawhṭannia ramri-ah buaina an siam chu an dem thu an sawi rualin, Mizoram sorkarin a chhàn lêt dan chu lungawithlak an tih thu an tarlang a; Vairengte khaw mipuiin huaisen taka hma an lakna chu chhuanawm an tih thu an sawi bawk.

Mizo Zirlai Pawl chuan, Assam police-te'n Vairengte daia Mizoram police-te awmna camp an luahlan hnua Mizoram police-te'n an chhàn lêt dan chu lungawithlak an tih thu sawiin, "Assam kut aṭanga hun rei lo te chhunga camp an la lêt nghal leh ram leh hnam chhan tura an inpekna chhuanawm kan ti tak zet. Kan police-te chêt phalna petu chief minister Pu Zoramthanga leh Home minister Pu Lalchamliana bakah, bialtu MLA Pu Lalrinsanga Ralte leh official-te inpekna fakawm kan ti tak zet a ni," an ti.

Mizoram police-te'n Assam police an nawr tawm dan chu chhuanawm an tih thu sawiin MZP chuan, "Kan sipaite hian chung lam aṭanga thu petu an awm a nih chuan tute hmaah mah an zâm bik lo tih hi kan pawm dan sa a ni," an ti a; ramria buaina awm apianga a hmatáwnga ṭang ṭhin Vairengte mipui inpekna leh chet danin Mizoram mipui thla a tihmuan thu an sawi.

MZP chuan, Bengal Eastern Frontier Regulation (BERF) 1875 ramri chu Mizote'n an pawm tlân ramri a nih thu sawiin, "Huaisen taka ṭan chhan zel tur te, ramri humhalhna kawnga chak lehzuala hma la tur leh a theih anga police indaih lohna a rang thei anga hnawhkhat turin kan ngen nghal a ni," an ti a; Mizo ram leh hnam zahawm nan huaisen taka hma la zel turin Mizoram sorkar an ngen.

Assam aṭanga buaina a awm apianga Bru-te'n khawthlang lama buaina an siam ve fo chu an duh loh thu sawiin MZP chuan, "Nimin maiah kan unau Chorei te lakah buaina siamin kut an thlak a, huan thlaite an khawih chhe bawk. Tuikukte hi hetianga che fo tawh lo turin kan hriattir a ni," an ti. MZP hruaitute chu nimin khan Vairengteah a ṭul apiang ti turin an kal a ni.

Mizo Students’ Union chuan, kum eng emaw zat ramria buaina awm tawh hnuah mipui duh dan ang taka ram chhan nan leh mipui thlavâng hauh nana silai hmeh puah a ni ta chu hmasawnna pakhata an ngaih thu an tarlang a, "CM Pu Zoramthanga leh Home minister Pu Lalchamliana te chungah lawmthu kan sawi a, hnung tawlh loa hma lam min panpui zel turin duhsakna kan hlan a ni," an ti.

MSU chuan, sorkar hruaitute'n mipui duh dana huai taka thutlukna an siam chu lawmawm an tih thu sawiin, a ṭul anga ramri venhimna thuam chak zel turin sorkar an ngen a; ramria CRPF-te duty dan chu lungawithlak loh an tih thu leh ramria duty zui zel turin rin ngam harsa an tih thu an sawi.

Ramri dáido khuate hmalaknaah an lawm thu sawiin MSU chuan, "Vairengte khaw mipui inpekna leh Mizoram police huaisenna kan fak tak meuh a, ramri chhan nana inpete chu a tàwp thlengin kan thlawp zel dawn. Buainate chinfel a nih thuai theih nan chak taka hma la zel turin sorkar kan ngen nawn a ni," an ti.

MSU chuan, ramri buaiin a nghawng theih thil tam takah Mizo mipui inlungrual a ngaih thu sawiin, 'Sem sem dam dam' tih chhawm nung zel turin mipui an ngen a, dawrkaite pawh 'Dam leh tlang khatah' tih thupuia nei turin an chah bawk.

Aizawl City College Joint Students' Union (ACCJSU) pawhin thuchhuah siamin, Vairengte dáia Assam police-te chet dan an dem thu leh thleng nawn tawh lo se an duh thu an tarlang a, Mizo sipaite leh Vairengte mipui chêt dan leh inpekna fakawm an tih thu an puang.

ACCJSU chuan, ramri buai chinfel kawnga Mizoram sorkar hmalakna a chak tawk loa an ngaih thu sawiin, chak leh awmze nei zawka hma la turin sorkar an ngen a, "Assam nen kan ramri hmun hrang hrangah buaina chhuak thei reng a nih avangin sipai tha tichak a, medical duty dah belh tur leh ṭul dangte buaipui nghal turin kan ngen bawk," an ti.