Tuirini lei chimah mi pakhat a thi Sorkarin magisterial inquiry a din

Sesawng leh Khaw-ruhlian inkara Tuirini lei chu nimin chawhma dar 9:45 vel khan a chim a, leiin a chimpui pahnih zinga pakhat HC Lalfakzuala (45) s/o Kamlova (L), Sesawng Venglai chu ka chhawn lohin a thi a, Laltleipuia Sesawng chu hliam na tak tuarin Thingsulthliah damdawiinah enkawl mek a ni.

Sesawng Branch YMA hruaitute hnen atanga thu dawn danin, HC Lalfakawma ruang hi Thingsulthliah damdawi inah endik a ni a, vawiinah Sesawngah vui a ni ang. Heng mite pahnih hi Tuirini kam lehlam Khawruhlian lama thingzai tura kal an ni a, thir lei dawh mek lai, a chhuat la phah loh chu zawhin lei lai vel an thlen laiin he lei hi a chim ta a ni.

Chief Minister awm loh hlana a aiawhtu, Home Minister, Pu R. Lalzirliana hovin a pisaah nimin khan he lei chim chungchang hi sawiho a ni a, thil awmdan dik tak chhui chhuak turin Aizawl Bawrhsap, Dr. A. Muthamma kaihhruai Magisterial Inquiry din ni se, Inquiry din atanga thla 3 chhungin a report sorkarah thehlut se tih a ni. He meeting-ah hian Home Minister, Pu R. Lalzirliana chuan lei chim vanga thi ta HC Lalfakzuala chhungte hnenah zangnadawmna cheng nuai 4 leh he lei chim vanga hliam, Laltleipuia tan tanpuina pek a remti a, an thutlukna siam hi bawhzui a, a tul dan anga thil ti nghal turin Chief Secretary, Lalmalsawma ruat a ni.

Tuirini lei dawh chim chungchangah MNF MLA Lalruatkima'n PWD changtu Minister chu bang turin a phut. Lalruatkima leh MNF hruaitu thenkhain lei dawh chim ta hi vawiin khan an tlawh a. Lalruatkima chuan PWD Minister Lal Thanzara chu mawhphurhna laa Minister a nih na atanga bang turin an phut tih a sawi a, nunna chan ta Pu HC Lalfakzuala chhungte hnenah cheng nuai 10 zangnadawmna pe tur leh, hliam tuar Laltleipuia chu a inenkawlna senso tum sak vek tura sorkar an phut thu a sawi bawk.

Lalruatkima chuan, Kum 2014 atangin Mizoramah tum 6 lei a chim tawh niin a sawi a, lei chim hi mi 3 in an thih phah tawh nia sawiin hei hi Sorkar tan thil zahthlak a ni a ti a, lei chim thin chu pumpelh theih a nih laiin, sorkar inthlahdah vanga thleng thinah a puh a ni.

Lei chimna hmun tlawh hian ZPM Thalai hruaitute an chairman Lalmuanpuia Punte hoin nimin khan an kal a, tlawmngai pawl hrang hrang hruaitute pawhin a hmunah an tlawh bawk.