PWD-in Tuirini lei dinhmun an sawifiah : Thihna thleng pawi an ti

Mizoram PWD chuan thuchhuah siamin, nimin chawhma lama Khawruhlian kawnga Tuirini lei a chim leh mi pakhat a thih phah chu pawi an tih thu an tarlang a; lei dinhmun an sawifiah nghal.

PWD tarlan danin, Sesawng leh Khawruhlian inkara Tuirini lei hi bailey bridge a ni a, Border Roads Organisation (BRO)-in kum 1973-a an dawh a ni. Double triple niin, ton 20-a rit zo tura ngaih a ni a; chutih rualin, lei a hlui tawh avangin hun eng emaw ti aṭangin ton 10 aia rit zawh phal a ni lo.

Lei a hlui tawh avangin a thar dawh tum a ni a, a dawhna atan nikum khan Ministry of Road Transport & Highways (MoRTH)-in cheng nuai 398 a pe. February 2017-ah lei dawhna tur hmanrua supply tur tender chhuah a ni a, M/S Essen fabricators Pvt.Ltd., Kharagpur, West Bengal thlan niin, March 24, 2017-ah supply order pek a ni.

Lei thar chu triple double re-inforced (TDR) tura ruahman a ni a, ton 38 dâwl zo tura ngaih a ni. January 8, 2018-ah lei dawh hna ṭan a ni a, February 2018 chhunga dawh zawh hman tura ruahman a ni. PWD chuan, lei hi hmar tlangdung zawng zawng tana pawimawh a nih avangin ngun leh uluk taka vil reng a nih thu tarlangin, "A bialtu EE mai bakah, SE-in riah chilhin lei hi dawh a ni," an ti.

Tuirini lei thar tur lui chungah dawh kai vek tawh, a chhuat phah chiah hmabak a nih tawh laia a chim chu hriatthiam a har tih sawiin PWD chuan, "A chim chhan âwm chhui chian a nih phawt loh chuan tun dinhmunah a chhan sawi theih a ni lo," an ti. Lei chim vanga thi leh hliam chhungte Mizoram PWD-in an tawrhpui tak zet tih an tarlang a ni.