Pawl ṭhiat kher loin ZPM a zawm theih - Lalhmangaiha Sailo

Mizoram People Conference (MPC) party chuan nimin klhan an pisaah an vice president Lalthansanga kaihhruaiin Executive Committee meeting an nei. MPC president Lalhmangaiha Sailo-in thu sawiin, "Ṭangrual pawl, ZPM-ah ram hmangaihtu leh ram hmasawnna veitu a duh apiang tan pawl ṭhiat kher loin zawm theih a ni," a ti.

Lalhmangaiha Sailo chuan, Zoram Peoples Movement (ZPM) chu August 15, 2017-ah din a ni tih sawiin, ZPM-ah chuan pawl ṭhiat kher loin tel theih a nih thu a sawi a, "ZPM-ah hian thawhhona ṭha leh lungrual taka kalpui mek zel a ni a, Mizoram hmun hrang hrangah Steering Committee din mek zel a ni," a ti a; ṭhahnemngai taka thawhhopuiah Mizoram mipui a sáwm.

Mizoram dinhmun thlirin, 'Six Basic Needs' chu ram hmasawnna tura a bulpui ber a nih thu sawiin Lalhmangaiha chuan, "Ram hmasawn reng reng mahni ram chhung leilung hausakna hai chhuak tam hi an ni zel a, leilung hausakna hai chhuak turin hma kan la zel dawn," a ti a; Mizote chu lehkhathiam leh hnam taima an ni a, kaihhruaina mumal awm se chu nasa taka hmasawn thei an nih thu a sawi.

MPC President chuan, Mizoram ramri a him tâwk lo hle tih sawiin, "Keini chuan kan ramri chin kan neih lêt leh theih nan theihtawpin hma kan la zel dawn. Ram hmangaihtu, chhantu tur chu ZPM ṭangrual pawl a ni tih Zoram mipuite hian lo hre mawlh rawh se," a ti.

MPC meeting hian resolution pass in, an party chu hnam inchîmralna ngai pawimawh ber an ni a, kum 1975 aṭangin Chakma foreigner chungchangah hma an lak thu an tarlang a, "Kum 30 chuang Mizorama sokarna changte'n ramri hung chungchangah hmalakna tluantling nei loa tawpsan a ni hi pawi kan ti hle. YMA-in CADC dan hmanga ṭhiat tura hma a la hi hlawhtling ngei se kan duhin kan thlâwp a ni," an ti.

Bengal Eastern Frontier Regulation Act, 1875-in Mizoram leh Assam ramri a puan chu an pawm dan a nih thu an tarlang bawk.