KHAWTHLIR

Heroin man
Mizoram Police-a District Special Branch (DSB), Aizawl chuan nimin chawhnu dar 2 khan Lalthlengliana (31) s/o Lalchungnunga, Chhinga Venga khawsa mek, Khawmawi, Myanmar khua nia insawi hnen aṭang heroin hawng 10 an man. An thil man hlut zawng hi market rate-ah Rs. 5,00,000 hû a ni.

Stand sawn
Traffic SP chuan thupek chhuahin, Chanmari BOC Junction-a two wheeler taxi stand siamna notification a lo chhuah tawh chu mipuite leh lirthei hmangtute him zawk nan tuna tihdagnlam a nih thu a tarlang. Thupek thar ang chuan, Chanmari BOC junction bula kawngpui lehlam, LN Tluangi Tailoring kawt, electric ban zâwn aṭanga tehin, Chaltlang lamah D.Kapa, Aizawl Arts kawt inkar (ft. 25-a thui) chu two wheeler taxi stand a ni tawh ang. Thupek hi February 19, 2018-a hman ṭan tur a ni.

Chapchar Kût
Serchhip District Chapchar Kut Organising Committee chu nimin khan district bawrhsap Sangchhin Chinzah hoin DC conference hall-ah an ṭhu a; kum hmasa lama Serchhipa Chapchar Kût hman dan thlir letin, kumina Chapchar Kut atana Rs. 1,00,000 a tlem deuha an hriat avangin, thuneitu sang zawk hnenah sum dil belh an rel.

Carpet hlan
Lawngtlai DC Dr Arun T chuan nimin khan Lawngtlai Electric Veng Badminton Hall leh Chawnhu Badminton Hall tihchangtlunna turin indoor carpet roll pali ve ve a pe. Carpet hi veng pahniha badminton club hruaitute hnenah a hlan a ni.

Pandal tlawh
Kumina KṬP General Conference neihna hmun tur, West Phailenga pandal sak mek chu nimin khan bialtu MLA Lalrobiaka'n a tlawh. MLA hi Conference Organising Committee-te nen an inkâwm a, Committee member-te'n inbuatsaihna an kalpui mek dan leh harsatnate an neihte an lo thlen a ni.