Health Minister hoin Synod leh MSACS-te'n HIV/AIDS donaa hmalakna tur an sawiho
Health minister Lal Thanzara hoin nimin khan Mizoram Synod hruaitute leh Mizoram State AIDS Control Society (MSACS) hotute'n Synod Office-ah Mizorama HIV/AIDS darh zel tur venna kawnga hmalak dan tur an sawiho.
Health Minister chuan, Synod inkhawmpuia HIV/AIDS harm reduction sawifiahna lehkhabu sem an phalsak leh, Serkawna Baptist Pastor Conference-a HIV/AIDS chungchanga inkawmhona an nei chu lawmawm a tih thu a sawi a, "Kohhran hruaitute'n HIV/AIDS beihna kawngah ṭha taka an lo dawngsawng ṭhin hi a lawmawm hle a ni," a ti.
Synod inkhawmpui hnuhnung berin, 'HIV/AIDS darh zel tur ven nan hmalak ni rawh se' tia thu an pass leh, chumi kawnga hma a lak tawhnate lawmawm a tih thu sawiin Lal Thanzara chuan, "Ram hmasawnna tiṭhuanawp thei, hnam hmelma HIV darh zel tur bei tura sorkar leh kohhrante
ṭanho pawimawh," a ti a; Mizoram chu mihring awm zat aṭanga tehin India ramah HIV/AIDS vei tamna ber a ni ta chu pawi a tih thu a sawi.
Lal Thanzara chuan, Mizo ringtute zingah kohhran chu platform ṭha tak nei, duh zawng leh duh loh zawng inzirtirna chak taka kalpui theitu a nih thu a sawi a; mipuite hnenah HIV/AIDS-in eng ang chiahin nge Mizoram a rûn mek dan leh a do dan turte inhrilhhriat zel a, tun aia nasa zawka do tlan dan tur ngaihtuahpui turin Synod hruaitute a sáwm a ni.
Synod executive secretary Rev. B Sangthanga, Synod Social Front enkawltu chuan, Social Front-in HIV/AIDS dona kawnga a hmalak tawhnate a tarlang a, "Mipat hmeichhiatna kawnga fihlim tur leh kawppui nei tawhte tana rinawm tura intiamna 'pledge card' te buatsaihin AIDS awareness drama, cartoon comic, seminar, awareness campaign-te leh AIDS chungchanga kaihhruaina bute buatsaih a ni tawh," a ti.
MSACS project director Dr Lalmalsawmi Sailo tarlan danin, tun dimhmunah Mizoramah HIV vei zingah kum 25-34 inkar an tam ber a; amaherawhchum tunlaiin drugs a hluar em avangin kum 15-24 inkarah HIV vei an tam chak hle a ni.