Chite lui châwmtu thianfai

Aizawl DC Office leh Save Chite Lui Coordination Committee ṭangkawp huaihawtin nimin khan Govt. Aizawl College leh Aizawl North College NSS volunteer-te'n Chite lui châwmtu pahnih - Chanmari lui leh Mirâwng lui an thianfai.

Lui tihfai hmaa Chite community hall-a inkhawm buatsaihah Aizawl DC Dr A Muthamma chuan, lui thenfai hna thawh inhuama ṭhalai tam tak an thawk chhuak chu lawmawm a tih thu a sawi a, "Chite lui hi ram dang khawpuia lui awmte ang bawkin tihbawlhhlawh a ni a, chutih ruala Mizoram vanneihna chu, a chhunga chengte'n faina leh thianghlimna kawnga hmasawn an duhna hi a ni," a ti.

Hnatlangah hian Govt. Aizawl College NSS volunteer-te'n Mirawng lui an tifai a, Aizawl North College NSS unit-te'n Chanmari lui an tifai thung a; college pahnih aṭang hian zirlai 150 vel ve ve an thawk chhuak a ni.