Champhai district-a bank-te'n CD ratio atana bituk an pha lo

Champhai District Consultative Committee (DCC) & District Level Committee (DLRC) chu nimin khan DC conference hall-ah additional DC Lalsangpuii Hmar hoin an ṭhu khawm a; Champhai district-a bank-te'n credit-deposit (CD) ratio atana bituk an phak loh thu tarlan a ni.

Lalsangpuii Hmar chuan, bank-a thawkte chu mipuite tana rawngbawltu an nih hre reng tura chahin, "Bank hman dan leh digital payment scheme hnuaia mipui tam zawk an inziah luh theih nan ṭan lak a ngai. Quarter hnuhnung ber chhunga target-te khûm a nih hman ngei theih nan banker leh line department hotute'n theihtawp an chhuah a ngai a ni," a ti.

Meeting-a tarlan danin, December 31, 2017 thlenga Champhai district-a bank hrang hrangte CD ratio khaikhawm chu 56.63% a ni a, hei hian CD ratio bituk (target) 60% a phak lo. Priority sector tana loan pek chhuah chu 68.32% a ni a, target 40% chu a khûm.

Agricultural segment hnuaia loan pek chhuah zat chu 19.88% a ni a, hei hian bituk zat 18% a khûm a; thingtlang mite tana bank hman dan zirtirna, Digital Financial Literacy Awareness Prog­ramme ṭum 66 neih niin, chumi hmang chuan mi 6,107-te zirtirna pek a ni.

Tun dinhmunah Champhai district-ah bank hrang hrang branch 22 a awm mek a, mi 5,715-in bank branch pakhat inṭâwm ang vel a ni. Mizoram pumah chuan mi 5,486-in bank branch pakhat inṭâwm ang a ni thung.

Meeting chuan, thingtlang leh hmun kilkhawr zawka awmte tana awlsam zawk nan banking outlet panga - Melbuk, Kelkang, N.Khawbung, Ngúr leh Vapâr khuaahte chawlhkar khata vawi 2/3 vel hawn ṭhin a nih theih dan tur an sawiho a ni.