PWD Minister báng turin phût

MNF general secre­tary Lalruatkima, MLA chuan, Sesawng leh Khawruhlian inkara lei, nimina chim chung­changah PWD Minister chu a mawhah laa báng tura a phût thu a sawi.

Lalruatkima hian nimin khan Tuirini lei chim a tlawh a; thu sawiin, "Moral responsibility lain PWD Minister hi a báng tur a ni. Sorkar hian he chhiat tawhnaa nunna chán Pu HC Lalfakzuala hi Rs. 10,00,000 tal zangnadawmna a pek kan phût a, hlim tuar hi a inenkawlna a tumsak kan phût bawk," a ti.

Vanduaina a thleng chu pawi an tih thu leh vauduaina tâwkte an tawrhpui tak zet thu sawiin Lalruatkima chuan, "Mizoramah lei a chim ngun ta hle mai a, kum 2014 aṭanga vawiin thleng hian lei ṭum ruk zet a chim ta a, mi pathum laiin nunna hlu tak an chán ta a ni," a ti a; lei a chim ṭhin leh miin an thih phah ṭhin chu thil zahthlak leh pawi tak a nih thu a sawi.

Lalruatkima chuan, "Hetiang vanduaina thleng leh ṭhin hi pumpelh theih a ni a, sorkar inthlahdah vang liau liaua thleng a ni. Congress sorkar hian tute emaw mawhchhiat tur zawng lo hian, Zoram hi an enkawl zo thlawt lo tih hi inpawm se a ṭha hle a ni," a ti a; Tuivawl bial leh Chalfilh bial mipui châk lakna kawng ber chim ta chu a rang thei ang berin sorkarin siamṭhat hna thawk nghal se an duh thu a sawi bawk.