Lei chim a khawih theih hrih loh - PWD : MNF-in PWD Minister bang turin an phut

Sorkarin a chhui chiang tur a din avangin PWD hotute chuan Tuirini lei chimna hnuhma chu a khawih theih hrih loh thu an sawi. Hetihlai hian MNF thuneitu sang pahnih National Core Committee leh Public Affairs Commitee nimina an president Zoramthanga hoa Mizo Hnam Run-a ṭhukhawm chuan Turini lei chim chhanah PWD minister Lal Thanzara an puh a, minister aṭanga bang turin an phut.

MNF chuan Tuirini lei dawh mek Thawhlehni zing dar 9:45 vela a chim chu vanduaithlak an tih thu tarlangin, "Thinlung takin nunna hlu tak chan chhungte kan tuarpui takzet a, hliam tuar pawh ṭha chhuak leh thuai turin kan duhsak a ni," an ti.

Mizoramah Congress sorkarna hnuaiah lei ṭum ruk a chim tawh thu sawiin MNF chuan, "Nunna chan pawh pathum lai an lo awm tawh a ni. PWD Minister hian he lei chim leh hi ama mawhphurhnaah la ngam ngei rawh se," an ti a, Lal Thanzara chu minister a nihna

aṭanga bang ngei tura an phut tlat thu an sawi.

Vanglaini palai zawhna chhangin, MNF hruaitute chuan Lal Thanzara bantir tur chungchanga hmalak dan tur an la rel lo.

PWD hotute'n Vanglaini palai zawhna an chhan danin, lei chim chhan chhui tur hian Mizoram sorkarin magisterial inquiry a din avangin lei chim hi khawih theih a ni hrih lo. A chhuitu lamin an duh tawka an zirchian hnua khawih chet an phal hma chuan khawih chet a ni lo ang.

Lei hi a ngaia dawh leh a nih dawn chuan estimate siamṭhat a ṭul thu sawiin PWD hotute chuan, "Hmanraw hlui engzat nge hman zui theih hriat theih a la ni loa, khawi cheta hmanraw dinhmun hriat a nih hma chuan estimate siam theih a ni hrih lo," an ti.

Hetihlai hian nimin khan PWD hotute chuan lei chimna bul hnai, tuna lei dawh mekna aia tawi zawka lei dawh theih dan a awm em tih nimin khan an enfiah a ni. Lei chim ta hi ft. 200-a seia dawh a ni.