Ṭhiak khaw daia mi su hlumtu Motor mipuiin an tichhia

February 13, Thawhlehni tlai khan Ṭhiak khaw daiah Bolero car pakhatin scooter-a chuang mi pakhat a su hlum a; he thil thleng avang hian nimin khan Sialsuk mipui an pung khawm a, mi su hlumtu motor an tichhia.

Sialsuk aṭanga thu dawn danin, Thawhlehni tlai dar 5:30 vel khan Ṭhiak khaw daiah Bolero car-in scooter-a chuang mi pakhat a su hlum a, Bolero chu a tlan tlang a ni. Bolero-in a sut hlum hi a hnuah Lalnuntluanga (27), Durtlang Ramthar Veng a ni tih hriat a ni.

Bolero hi tlan tlang mah se, Sialsuk police-te hriattir niin, police-te'n Sialsukah an lo man a, motor khalhtu chu Pranesh Shil niin, mi dang pahnih an chuang. Police-te chuan Pranesh Shil hi nimin khan Aizawlah an thawn nghal a, Court-ah hruai niin, magistrate thu angin Central Jail-ah dah luh a ni.

Bolero hi Thenzawla Horticulture College sak hna thawktu, Triveni Construction Ltd. ta a ni.

Bolero car-in mi a sut hnua ngaihsak zui loa a tlan tlang avangin Sialsuk khaw mipui an thinrim a, Bolero hi an tichhe nual a ni. Sialsuk mipuite hi nimin khan Sialsuk PS bula kal turin an inau khawm bawk a; mi ṭhahnem tak kal khawm mah se, thil pawi lian a thleng zui lo nia thu dawn a ni.