Mizoram pumah thisen unit 944 pek a ni

Association for Voluntary Blood Donation (AVBD) chuan, an thawhpui pawl dangte nen nimin khan Valentine's Day pualin Aizawl leh district khawpui tinah blood donation camp an huaihawt a, Mizoram pumah thisen unit 944 pek a ni.

Valentine's Day Blood Donation Camp hi Aizawlah chuan Mizo High School Hall-ah AVBD, Mizo Domain Mizoram (MDM), MSACS leh Aizawl Civil Hospital blood bank-te'n an huaihawt a, mipa 334 leh hmeichhia 74 ten thisen unit 408 an pe. Inaugural programme chu minister Vanlalawmpuii Chawngthu-in a hmanpui.

Vanlalawmpuii Chawngthu chuan, AVBD bultuma Mizo ṭhalaite'n thisen pekna ní atana Valentine's Day an hmang ṭhin chu ropui a tih thu a sawi a, 'Khawvela Valentine's Day hman dan ṭha ber a nih hial a rinawm. Mi dangte ṭanpuina ní atana Mizo ṭhalaite'n an hmang hi an fakawm tak zet a, vawiina kal khawmte hi mi dang tana malsawmna thlentu in ni a, rawngbawlna hlu tak a ni," a ti.

Minister chuan, mi tinin tih theih zawng leh thiam zawng chi hrang hrang an nei tih sawiin, "Kan tih theih a inang lo a, kan tih theih chinah ṭheuhah mi dang tana malsawmna thlentu kan ni thei a ni," a ti a; thisen petu nih bakah, mi dangte tihhmuhtu leh tiphurtu ni tur leh, thisen pe zel thei tur leh HIV/AIDS laka fihlim tura nun vawng uluk turin ṭhalaite a chah.

MSACS project director Dr Lalmalsawmi Sailo chuan, Mizo ṭhalaite thisen pek chuan nunna tam tak a chhan leh ngei a beisei thu sawiin, "Ṭhahnemngai takin thisen i pe zel ang u. Thisen pe thei turin thisen thianghlim a ngai a, thisen thianghlimna turin taksa hrisel neih a ngai," a ti a; thisen pe reng theite'n HIV an vei ngai lo a, thisen pek chu HIV laka invenna a nih thu a sawi.

Aizawl Civil Hospital (ACH) medical superintendent Dr KL Remsanga pawhin thu sawiin, ACH blood bank-a thisen an dawnte chu ACH-ah chauh ni lo, private hospital-ahte pawh pek chhuah a nih leh dawn thu leh, damlote nunna chhan nan hman a nih thu a sawi.

Valentine's Day-a thisen pek rûnpui hi kum 2010-ah tih ṭan a ni a, kum 2013 aṭangin Aizawl chauh ni lo, district dangah pawh tih ṭan a ni. Kum 2010 aṭanga kum 2017 thlenga Valentine's Day-a thisen pek tawh zat chu unit 4,752 a ni a, kumina pek nen unit 5,696 a tling tawh a ni.