KHAWTHLIR

Sipaiah 31 tling
Mizoram Youth Commission (MYC) chuan thuchhuah siamin, February 9, 2018-a sipai lakna result tihchhuah takah MYC hnuaia army coaching kal zinga mi 31 an tlin thu an tarlang, "Mizo ṭhalai tam zawkte sipaia an luh theihna atan chak taka hmalak zel tum a ni. Hei bakah hian Mizo ṭhalai tam zawkte'n MBBS an zir theih nan NEET coaching class buatsaih turin hmalak mek a ni," an ti.

Tlan khap
Traffic SP chuan thupek chhuahin, PWD Aizawl Road South Division-in February 16, 2018 aṭangin Khatla, Bible House bulah lei dawh hna an thawh dawn avangin, hna thawh ṭan ní aṭangin lirthei tlan khap a ni dawn tih a puang. Thupek hian hna thawh zawh hma zawng a huam ang.

Thilpek hlan
255 Battalion, CRPF Zemabawk chuan February 13, Thawhlehni khan Civic Action Programme hnuaiah Zuangtui Chhimveng Welfare Association, Mission Vengthlang Primary School, Hmangaihna Run (Zemabawk), YMA Zemabawk leh Zemabawk North MUP leh RMSA High School Tuirial Airfield-te hnenah solar light, folding stretcher, blanket, water storage tank, carrom board, water filter leh ludo board leh chess board-te an hlan.

Exhibition hawng
Lawngtlai Horticulture Division leh Lawngtlai Florists Association chuan, nimin khan LADC conference hall-ah Horticulture Exhibition 2018 an buatsaih a, minister C Ngunlianchunga'n a hawng. Exhibition hian February 16 thleng a awh dawn a, pangpar leh thlai chi hrang hrang 35 pho chhuah a ni.

Medical camp
46 Assam Rifle chuan Thawhlehni leh nimin khan Healthy Mizoram Campaign pualin Ngopa leh Vaikhawtlang mipuite tan Ngopa-ah medical camp an buatsaih. Camp-ah hian mipuite chu medical expert-te'n 'Awareness workshop on Common Health Related Issues, Drug Abuse and HIV & AIDS' an neihpui a ni.