Kolasib district ODF-ah puan a ni

Kolasib district chu páwn lama inthiar awm lohna, open defacation free (ODF)-a puan a nih lantirna certifcate chu nimin khan Kolasib DC conference hall-ah PHE secretary KT Beicho-in DC R Zarzosanga hnenah a hlan.

KT Beicho chuan, ODF district nih chu a tâwk mai loh thu sawiin, "Chhunzawm tur tam tak a awm a, ODF nihna chu chhawm nun reng a ngai. Mihring hrisel zawk nan tui thianghlim tlan bakah boruak a lo thiang­hlim zawk nan tui chhe paihna ṭha taka siam chu kan ngaih pawimawh a ṭul tak zet a ni," a ti a; thianghlimna leh hriselna chu rilru puthmangah chauh ni loin, a taka nunpui a pawimawh thu a sawi.

Kolasib DC chuan, chawimawina certifcate Kolasib-ah ngei hlan an ni chu lawm­awm an tih thu sawiin, ODF ni thei tura thawh hlâwk tak tak department hrang hrang leh tlawmngai pawl hrang hrangte chungah lawmthu a sawi a; NGO hrang hrangte chu thawhpui chhunzawm zelah a sáwm.

PHE executive engineer K Zohmingliana tarlan danin, ODF district ni thei turin VC-te hmalaknain khuate ODF-ah mahnia inpuan tur a ni a, chu chu BDO-ah thehlutin, BDO-in chu khuaa chenna in 20% a endik ang a, pawm tlaka a ngaih chuan District Swachh Bharat Mission (DSBM) Chairman hnenah thlen leh a ni.

DSBM hnuaia verification team-in chenna in 5% an enfiah anga pawm tlaka an ngaih chuan State Mission Director hnenah an thlen ang a, State Level Verification team-in chenna in 2% an endik ve leh hnuah pawm tlaka an ngaih chuan ODF nihna an pawmsak ṭhin a ni.

ODF hnuaia ek-in endiknaah hian ek-in chuan tui tlan a tibawlhhlawh tur a ni lo a, tho a awm tur a ni lo a, rim ná a chhuah tur a ni lo bawk a; chungte chu tehfung atan hman a ni.