Covid-19 vei 5 hmuh belh a ni Mizoramin RT-PCR a neih belh
June 5, Ningani zan khan Mizoramah Covid-19 vei mi panga hmuh chhuah belh leh a ni a, anni nen hian Mizoramah Covid-19 vei mi 21 an awm mek. Hetih lai hian, nimin khan Mizoramin Covid-19 kai leh kai loh finfiahna khâwl Reverse Transcriptase Polymerase Chain Reaction (RT-PCR) pakhat a neih belh.
Covid-19 vei Ningani zana hmuh chhuah tharte hi Delhi aṭanga rawn haw mi pali leh Gujarat aṭanga rawn haw mi pakhat an ni a, May 28 leh June 1 inkara rawn haw an ni. Mipa pathum leh hmeichhe pahnih niin, kum 22 leh 29 inkar an ni a, an zinga paliin Covid-19 natna lan chhuah dan (symptom) an nei a, pakhat chuan symptom a nei lo thung.
Vei hmuh thar zinga pali chu State Referral Hospital (Zoram Medical College)-a admit tawh sa an ni a, ZMC-ah enkawl chhunzawm a ni ang. Pakhat chu Lunglei district mi niin, Eklavya Residential School, Lungleia quarantine mek a ni a, Covid Care Centre, Pukpuiah enkawl zui a ni.
ZMC aṭanga Vanglaini thu dawn danin, Covid-19 vei hmuh chhuah thar leh hmuh chhuah tawhte zingah dinhmun hlauhthawnawm leh ICU-a dah ngai an awm lo a, an vaiin Isolation Ward-ah dah an ni.
Hetih lai hian, Mizoram Science, Technology & Innovation Council (MISTIC) leh Health department ṭangkawp hmalaknain Mizoram chuan RT-PCR khawl pakhat a neih belh.
Khawl hi sorkar laipuia Department of Biotechnology hnuaia Institute of Bioresources and Sustainable Development (IBSD) aṭanga dawn a ni a, nimin khan Manipur aṭangin helicopter hmangin Mualpui Helipad-ah phurh thlen niin, ZMC-ah lâk nghal a ni.
Vanglaini palai zawhna chhangin Health secretary H Lalengmawia chuan, kháwl thar chu ni hnih/thum hnuah hman theih beisei a nih thu a sawi a, "Manipur-ah chuan trial run an nei tawh tho a, mahse, ZMC-ah dah a nih hnuah trial run neih ve leh tho a ni ang," a ti a; ZMC-a laboratory building-ah khawl dang pawh a la len thu a sawi.
H Lalengmawia chuan, tun dinhmunah RT-PCR pahnih enkawltu tur mi thiam an indaih thu sawiin, "Duhthusama indaih ni lo mah ila, khawl pahnih enkawl thei chu kan nei," a ti.
Chennai aṭanga rawn hawte RT-PCR hmanga endik an nih dawn leh dawn loh zawhna chhangin, "A Chennai ang zawng chuan ka sawi thei lo a, mahse, order kan chhuah tawh angin red zone aṭanga rawn hawte chu a tam thei ang ber endik kan tum," a ti a, khawl pahnih a awm chuan sample pawh tam zawk endik theih a nih tur thu a sawi.
A tlangpui:
• Covid-19 vei zingah dinhmun hlauhthawnawm an awm lo
• Covid-19 vei mekte Delhi aṭanga haw 18, Kolkata aṭanga haw 2, Gujarat aṭanga haw 1
• ZMC-ah mi 19 leh Lungleiah mi pahnih enkawl mek a ni
• RT-PCR neih thar ni 2/3 hnuah hman theih beisei a ni
• RT-PCR khawl thar enkawl tur mithiam an la indaih