World Environment Day hman a ni

Nimin kha World Environment Day a ni a, thupui chu 'Celebrate biodiversity/care for nature' tih a ni. Mizoram hmun hrang hrangah hman a ni a, thing ṭiak eng emaw zat phun a nih bakah, kum hmasa lama thing phun tawhna hmunhmate thlawh fai a ni. Governor PS Sreedharan Pillai chuan Raj Bhavan-ah thing ṭiak a phun.

Lungleiah chuan EFCC department bultumin Hi-Tech Nursery, Pukpuiah hman a ni a, Lunglei district MJA president H Lalthansanga khuallian a ni. H Lalthansanga chuan, Mizoram mipuiin environment humhalh tura ṭan an lak a ṭul thu sawiin, "Mahni hmasial tak pawha kan humhalh a ngai a ni," a ti a; environment humhalha enkawl leh venhim chu chanchin ṭha hril theihna pawimawh tak a nih thu a sawi.

World Environment Day hmanna inkhawm kaihruaitu Lunglei DFO Lalrammawii Sailo chuan, kumin hi World Environment Day vawi 46-na a nih thu sawiin, "Environment humhalha venhim leh tihthianghlim hi kan mawhphurhna a ni a, kan bawlhhlawh sâwngbawl dan leh kan ei bángnawi senghawi dante hian kan environment nasa takin a nghawng thei a ni," a ti.

Inkhawmah hian Forest ranger Vanlalzarzoliana kaihhruaiin World Environment Day thutiam an chham rual a; inkhawm zawhah thing an phun nghal a ni.

World Environment Day pualin nimin khan Mamit district bawrhsap Dr Lalrozama hoin NH-44A Mualpui péng aṭanga chhuah lam kawngpuiah thing phun hna­tlang neih a ni a, YMA Sub-Hqrs. Mamit hruaitute leh Mamit MJA member-te an tel. Mamit Offi­cers' Club leh Nehru Yuva Kendra, Mamit ṭhalai rualte'n Tlaizawng ṭiak 300 vel kawngpui dungah an phun a ni.

Khawzawlah DC H Lianzela hoin KVK Khawzawl Complex-ah thing phun a ni a; H Lian­zela chuan, "Khawvel boruak lum zelah thing leh maute pawimawhna kan hre thar zel a, kan zavaia mawh a ni tih hriaa humhalh lam leh thing phun belh kawnga 

ṭha­hnem ngaih hi mi tin mawhphurhna a ni," a ti.

Zoram Entu Pawl (ZEP) pawhin World Environment Day hi Ser­chhip district-ah an hmang a; EFCC department, Chhing­chhip Range-in a thlàwn­in an thing ṭiak 600 chu Khumtung, Baktawng, Buhkang­kawn, ­Chhingchhip Mualpui, Chhing­chhip Venghlun, Chhiahtlang, Keiṭum leh Serchhip VC I, II leh III-ahte an sem a, anmahni'n an phun bawk.